कञ्चनपुर । सुदूरपश्चिमका बैतडी र कञ्चनपुरबाट प्रकाशित हुँदै आएको जनसरोकार पोष्ट राष्ट्रिय दैनिकले आफ्नो १४औँ वार्षिकोत्सवको अवसरमा बिरामी पत्रकार राजेन्द्र विष्टलाई उपचार खर्च सहयोग गरेको छ।
पत्रिकाका प्रकाशक तथा प्रधान सम्पादक राजेन्द्रप्रसाद अवस्थीले वीर अस्पतालमा उपचाररत पत्रकार विष्टको उपचारका लागि ५ हजार १ सय रुपैयाँ सहयोग गरेका हुन्। आफ्नो खुसीमा सहकर्मी पत्रकारको उपचारमा सानो भए पनि सहयोग गर्ने उद्देश्यले रकम प्रदान गरिएको अवस्थीले बताए।
सहयोग रकमको ट्रान्सफर भौचर नेपाल पत्रकार महासंघ कञ्चनपुरका अध्यक्ष सुरेशसिंह धामीलाई हस्तान्तरण गरिएको हो।
सहयोग हस्तान्तरण कार्यक्रममा बोल्दै अध्यक्ष धामीले सहकर्मी संकटमा रहेका बेला आफ्नो खुसीमा समेत सहयोग र हातेमालो गर्नुपर्ने बताए। उनले पत्रकार विष्टको उपचारका लागि आ–आफ्नो ठाउँबाट सक्दो सहयोग गर्नसमेत आग्रह गरे।
नेपाल पत्रकार महासंघ कञ्चनपुरका साधारण सदस्य तथा प्रेस चौतारी नेपालका पूर्व केन्द्रीय उपाध्यक्षसमेत रहेका विष्ट हाल राष्ट्रिय समाचार समिति (रासस) को केन्द्रीय कार्यालय काठमाडौंमा कार्यरत छन्। जटिल रोगका कारण वीर अस्पतालमा उपचाररत विष्टको उपचारमा ठूलो रकम आवश्यक पर्ने भएकाले सहयोगका लागि आह्वान गरिएको छ।
झण्डै अढाई दशकदेखि पत्रकारितामा सक्रिय विष्टको उपचारमा सक्दो सहयोग गर्न जनसरोकार पोष्टका सम्पादक अवस्थीले आग्रह गरेका छन्।
जनसरोकार पोष्ट राष्ट्रिय दैनिकले १४ वर्षदेखि सुदूरपश्चिमका समसामयिक विषय, अभाव, बेथिति तथा भ्रष्टाचारविरुद्ध निरन्तर आवाज उठाउँदै आएको जनाएको छ। वार्षिकोत्सवको अवसरमा सहकर्मी पत्रकार तथा विभिन्न सरोकारवाला निकायका प्रतिनिधिले पत्रिकालाई शुभकामना दिएका थिए।
Discussion about this post