राष्ट्रिय सभामा नेपाली कम्युनिस्ट पार्टीकी सांसद रेणु चन्दले सरकार गठन भएको चार महिना बितिसक्दा पनि जनअपेक्षाअनुसार काम हुन नसकेको भन्दै सरकारको कार्यशैली र कार्यक्षमतामाथि प्रश्न उठाएकी छन्।
बिहीबार राष्ट्रिय सभाको बैठकमा बोल्दै सांसद चन्दले सरकारले पूरा गर्न नसकिने आश्वासन बाँडेको आरोप लगाइन्। उनले सरकारलाई विगतका सरकारलाई दोष दिएर आफ्नो असक्षमता लुकाउने प्रयास नगर्न आग्रह गरिन्।
चन्दले स्वास्थ्य बीमाको अवस्था तथा केदारनाथ पराजुली दम्पतीको आत्मदह (जलसमाधि) जस्ता गम्भीर विषयमा समेत सरकारको ध्यानाकर्षण गराइन्।
‘नयाँ’ र ‘जान्ने’ भनिएका राजनीतिक शक्तिले ‘सिक्दै छौँ’ भन्दै जिम्मेवारीबाट पन्छिन नमिल्ने उनको भनाइ थियो।
ग्यासजस्ता आधारभूत आवश्यकता समेत सहज रूपमा उपलब्ध गराउन नसकेको भन्दै उनले सरकारमाथि नैतिक प्रश्नसमेत उठाइन्। उनले भनिन्, ‘जनतालाई आधारभूत सिलिण्डर ग्यास दिन नसक्नेले कुन नैतिकताको आधारमा ३५ वर्षको हिसाब मागेको ?’
जनताका प्रश्नबाट विचलित नभई सरकारले आफ्नो जिम्मेवारी पूरा गर्नुपर्नेमा जोड दिँदै सांसद चन्दले सरकारलाई गम्भीर र जवाफदेही बन्न सचेत गराइन्।
Discussion about this post