कञ्चनपुर । कञ्चनपुरको दोधारा चाँदनी नगरपालिकामा मनसुनजन्य विपद्को जोखिम न्यूनीकरण र पूर्वतयारीलाई सुदृढ बनाउने उद्देश्यले ‘विपद् पूर्वतयारी तथा प्रतिकार्य योजना २०८३’ को प्रभावकारी कार्यान्वयनका लागि ‘टेबलटप’ कृत्रिम नमुना घटना अभ्यास गरिएको छ। दोधारा चाँदनी नगरपालिकाको आयोजना तथा नेपाल राष्ट्रिय समाज कल्याण संघ (एनएनएसडब्लुए), मर्सीकोर नेपाल, डिसिए नेपाल र युनिसेफको साझेदारीमा उक्त अभ्यास कार्यक्रम सञ्चालन गरिएको हो।
उक्त अभ्यास मनसुनमा आउन सक्ने बाढी, डुबान, भूक्षय र अत्यधिक वर्षा जस्ता प्राकृतिक विपद्हरूको सामना गर्न तथा सम्भावित विपद् बाढी र तातो लहर (लू) को प्रभावलाई समेत न्यूनीकरण गर्दै सरोकारवाला निकायहरूलाई पूर्वतयारी अवस्थामा राख्ने उद्देश्यले आयोजना गरिएको हो।
दोधारा चाँदनी नगरपालिकाका नगर प्रमुख किशोर कुमार लिम्बुले दोधारा चाँदनी भौगोलिक रूपमा पनि विपद्को उच्च जोखिममा रहेको क्षेत्र भएकाले यस्ता प्राविधिक र व्यावहारिक अभ्यासहरूले संकटको समयमा तत्काल सही निर्णय लिन जनप्रतिनिधि र कर्मचारीलाई सक्षम बनाउने बताउनुभयो। उहाँले नगरको विपद् व्यवस्थापन योजनालाई केवल कागजमा मात्र सीमित नराखी समुदायस्तरमै कार्यान्वयन गर्न नगरपालिका प्रतिवद्ध रहेको बताउनुभयो।
त्यस्तै, नगर उपप्रमुख गंगा जोशीले विपद्को समयमा सबैभन्दा बढी महिला, बालबालिका र ज्येष्ठ नागरिक प्रभावित हुने भएकाले प्रतिकार्य योजना बनाउँदा र नमुना अभ्यास गर्दा उनीहरूको सुरक्षालाई प्राथमिकतामा राखिनुपर्नेमा जोड दिनुभयो। उहाँले विभिन्न दातृ निकायहरूसँगको यो एकीकृत सहकार्यले नगरको विपद् प्रतिकार्य क्षमतालाई थप बलियो बनाएको बताउनुभयो।
नेपाल राष्ट्रिय समाज कल्याण संघ (एनएनएसडब्लुए) र मर्सीकोर नेपालको साझेदारीमा सञ्चालित ‘जलवायु उत्थानशिल समुदाय (सिआरसी)’ परियोजनाका संयोजक महेश घिमिरेले यस अभ्यासले सबै सरोकारवाला निकायहरूलाई एकसाथ बसेर योजना बनाउन र विपद्को समयमा आ-आफ्नो जिम्मेवारी र भूमिका बुझ्न महत्त्वपूर्ण मद्दत पुर्याएको बताउनुभयो। उहाँले आगामी दिनमा आउन सक्ने मनसुनी विपद् र जलवायु परिवर्तनका कारण थपिएको ‘तातो लहर’ (लू) जस्ता सङ्कटबाट समुदायलाई सुरक्षित राख्न यो अभ्यास कोसेढुङ्गा सावित हुने विश्वास व्यक्त गर्नुभयो।
यस प्रकारका कृत्रिम अभ्यासले दोधारा चाँदनी नगरपालिकालाई सम्भावित मनसुनी विपद्बाट हुने क्षति न्यूनीकरण गर्न र समुदायलाई पूर्वसतर्क राख्न थप सक्षम बनाउने अपेक्षा गरिएको छ। कार्यक्रममा नगरपालिकाका जनप्रतिनिधि, कर्मचारी, नेपाली सेना, नेपाल प्रहरी तथा सशस्त्र प्रहरी बलका प्रतिनिधि, विषयगत शाखाका प्रमुख एवम् सरोकारवाला निकायहरूको सक्रिय सहभागिता रहेको थियो।
Discussion about this post