कञ्चनपुर । नेपाल राष्ट्रिय समाज कल्याण सङ्घ (एनएनएसडब्लुए) द्वारा सञ्चालित पियुडी (PUD) परियोजना अन्तर्गत स्थानीय सरोकारवाला निकायहरूसँग ‘क्षति न्यूनीकरण’ (Harm Reduction) सम्बन्धी समन्वय तथा अभिमुखीकरण बैठक सम्पन्न भएको छ। लागू औषध प्रयोगकर्ताहरूमा हुनसक्ने स्वास्थ्य तथा सामाजिक जोखिमलाई कम गर्ने उद्देश्यले आयोजना गरिएको उक्त कार्यक्रममा सरोकारवालाहरूसँग छलफल गरिएको हो।
परियोजनाका संयोजक नवराज पाण्डेका अनुसार, यस छलफलको मुख्य उद्देश्य क्षति न्यूनीकरणका उपायहरूबारे विस्तृत जानकारी प्रदान गर्नु, परियोजनाका दीर्घकालीन लक्ष्यहरू प्रस्ट्याउनु र ‘Harm Reduction’ अन्तर्गत सञ्चालन भइरहेका कार्यक्रमहरूबारे सरोकारवालालाई अवगत गराउनु रहेको थियो। कार्यक्रममा विशेष गरी लागू औषधको दुरुपयोगबाट हुने क्षतिलाई कसरी कम गर्न सकिन्छ र प्रयोगकर्ताहरूलाई कसरी मुख्यधारामा ल्याउन सकिन्छ भन्ने विषयमा केन्द्रित रहेर छलफल गरिएको थियो।
बैठकमा महाकाली प्रादेशिक अस्पताल, जिल्ला स्वास्थ्य कार्यालय, जिल्ला प्रशासन कार्यालय, जिल्ला प्रहरी कार्यालय र भीमदत्त नगरपालिका लगायतका सरोकारवाला निकायका प्रतिनिधिहरूको सहभागिता रहेको थियो। कार्यक्रममा सहभागी निकायहरूबाट प्राप्त सुझावहरूलाई संकलन गरी आगामी दिनमा कार्यक्रमलाई थप प्रभावकारी बनाउने लक्ष्य राखिएको छ।
संयोजक पाण्डेले विभिन्न निकायहरूसँगको यो समन्वयले समाजमा विद्यमान लागू औषध सम्बन्धी जटिलताहरूलाई न्यूनीकरण गर्न र प्रभावित व्यक्तिहरूलाई आवश्यक परामर्श तथा स्वास्थ्य सेवामा पहुँच पुर्याउन महत्वपूर्ण भूमिका खेल्ने बताए।
सरोकारवाला निकायहरूले पनि यस किसिमको मानवीय र सामाजिक कार्यमा आफ्नो पूर्ण सहयोग र ऐक्यबद्धता रहने प्रतिबद्धता जनाएका छन्।
Discussion about this post