कैलाली । कैलालीको चुरे गाउँपालिकामा रहेका सामुदायिक विपद् व्यवस्थापन समितिहरूलाई दक्ष बनाउने उद्देश्यले ५ दिने ‘सामुदायिक प्रतिकार्य टोली तालिम’ बिहीबारदेखि सुरु भएको छ। चुरे गाउँपालिका वडा नम्बर -६ का वडा अध्यक्ष प्रेम बहादुर साउदको अध्यक्षतामा तालिमको उद्घाटन गरिएको हो।
मर्सीकोर नेपाल, नेपाल राष्ट्रिय समाज कल्याण सङ्घ (एनएनएसडब्लुए) र द कोकाकोला फाउन्डेसनद्वारा सञ्चालित ‘नेपालमा पूर्वानुमानमा आधारित पूर्वकार्यको सुदृढीकरण’ (सान) परियोजना अन्तर्गत उक्त तालिम सञ्चालन गरिएको हो। तालिममा चुरे गाउँपालिका वडा नम्बर -३ र -६ अन्तर्गतका कालिका, पिपल चौतारा, शान्तिनगर र लेकबेसी सामुदायिक विपद् व्यवस्थापन समितिका ६–६ जना गरी कुल २४ जनाको सहभागिता रहेको छ।
तालिममा सञ्चार र समुदाय परिचालन, सामुदायिक नक्सांकन, आधारभूत खोज तथा उद्धार, अवस्थाको विश्लेषण, खोज विधि, संरचना र संकेत चिन्हहरू, आगलागी, आपतकालीन अवस्था व्यवस्थापन, पानीजन्य आपतकालीन अवस्था र घाइतेको उद्धार तथा स्थानान्तरण सम्बन्धी सीप सिकाइने सान परियोजनाका संयोजक देवराज बडुले बताउनुभयो। उहाँका अनुसार तालिममा महामारी परिचय, प्राथमिक उपचार, मनोसामाजिक सहयोग, मुटु तथा फोक्सो पुनर्जीवन प्रक्रिया (CPR), रक्तस्राव र चोटपटक व्यवस्थापन, तनाव व्यवस्थापन, जलन (Burn) व्यवस्थापन तथा विषाक्तता र जनावरको टोकाइ सम्बन्धी उपचारका बारेमा समेत व्यवहारिक ज्ञान प्रदान गरिनेछ।
नेपाल रेडक्रस सोसाईटीका प्रशिक्षकद्वय सुशील चौधरी र खेमराज विश्वकर्माले प्रशिक्षण दिने जनाइएको छ। चुरे गाउँपालिकाका विपद् सम्पर्क व्यक्ति काली प्रसाद भट्टले विपद्को समयमा समुदायका व्यक्तिहरू पहिलो ‘रेस्पोन्डर’ हुने भएकाले यो तालिमले गाउँपालिकाको विपद् व्यवस्थापन क्षमतालाई मजबुत बनाउने बताउनुभयो।
उद्घाटन कार्यक्रममा बोल्दै वडा अध्यक्ष प्रेम बहादुर साउदले तालिममा सिकेको सीपलाई केवल कोठामा मात्र सीमित नराखी समुदायमा गएर विपद्को समयमा सदुपयोग गर्न सहभागीहरूलाई आग्रह गर्नुभयो। उहाँले तालिममा ध्यान दिएर बस्न र यहाँ सिकेका कुराले भविष्यमा आइपर्ने जोखिम न्यूनीकरणमा महत्वपूर्ण भूमिका खेल्ने विश्वास व्यक्त गर्नुभयो।
५ दिनसम्म चल्ने यो तालिमले स्थानीय स्तरमा दक्ष जनशक्ति तयार गरी विपद्बाट हुन सक्ने धनजनको क्षति कम गर्ने लक्ष्य लिएको छ।
Discussion about this post