दोदा नदीको कटान रोक्न लालझाडीमा ६०० मिटर जैविक तटबन्ध निर्माण सुरु

कञ्चनपुर । कञ्चनपुरको लालझाडी गाउँपालिका वडा नम्बर १ विनवारीमा दोदा नदीको कटान नियन्त्रणका लागि जैविक तटबन्ध निर्माण कार्य सुरु गरिएको छ। बिहीबार गाउँपालिकाका अध्यक्ष निर्मल रानाले एक कार्यक्रमका बीच तटबन्ध निर्माण कार्यको औपचारिक शुभारम्भ गर्नुभएको हो।

मर्सीकोर नेपाल, नेपाल राष्ट्रिय समाज कल्याण सङ्घ (एनएनएसडब्लुए) र द कोकाकोला फाउन्डेसनद्वारा सञ्चालित ‘नेपालमा पूर्वानुमानमा आधारित पूर्वकार्यको सुदृढीकरण’ (सान) परियोजना सँगै पेसवान र प्राक्टिकल एक्सन नेपाल तथा लालझाडी गाउँपालिकासँगको प्रत्यक्ष समन्वय र सहकार्यमा यो कार्य अगाडि बढाइएको हो।

वर्षौँदेखि दोदा नदीको बाढी र कटानका कारण समस्या झेल्दै आएका स्थानीयको जोखिम न्यूनीकरणका निम्ति ६०० मिटर लामो जैविक तटबन्ध निर्माण गर्न लागिएको हो। यस योजनामा लालझाडी गाउँपालिकाको २२ लाख २ हजार, एनएनएसडब्लुए को ७ लाख ६६ हजार र पेसवानको १३ लाख ७४ हजार रुपैयाँ लगानी रहेको छ भने स्थानीय समुदायले १ लाख ३५ हजार बराबरको जनश्रमदान गर्नेछन्।

सान परियोजनाका संयोजक देवराज बडुले तटबन्ध निर्माणले नदी किनारका बस्ती र खेतीयोग्य जमिन जोगाउन महत्वपूर्ण भूमिका खेल्ने बताउनुभयो। उहाँका अनुसार यो प्रविधि कम खर्चिलो र वातावरणमैत्री भएकाले समुदायका लागि निकै प्रभावकारी हुनेछ।

साथै, एनएनएसडब्लुए र पेसवानले लालझाडीमा थप ३०० मिटर तटबन्ध निर्माणका लागि पालिकासँग मिलेर संयुक्त लागत अनुमान (इस्टिमेट) सहितको योजना समेत तयार पारिरहेका छन्। स्थानीय सरकार र विभिन्न संघसंस्थाहरूको यो संयुक्त प्रयासले बर्खायाममा बाढीको डरले त्रसित हुने विनवारीका स्थानीयहरूमा आशा जगाएको छ।