कञ्चनपुर । कञ्चनपुरको पुनर्वास नगरपालिका वडा नम्बर ७, परासनमा दोदा नदीको कटान नियन्त्रणका लागि जैविक तटबन्ध निर्माणको कार्य तीव्र गतिमा अघि बढाइएको छ। वर्षेनी नदी कटान र डुबानको जोखिम झेल्दै आएका परासन क्षेत्रका स्थानीयहरूले यसपटक मनसुन सुरु हुनुअगावै निर्माण कार्य सम्पन्न गर्ने लक्ष्यका साथ काम गरिरहेका छन्।
मर्सीकोर नेपाल, नेपाल राष्ट्रिय समाज कल्याण सङ्घ (एनएनएसडब्लुए) र द कोकाकोला फाउन्डेसनद्वारा सञ्चालित ‘नेपालमा पूर्वानुमानमा आधारित पूर्वकार्यको सुदृढीकरण’ (सान) परियोजना अन्तर्गत पुनर्वास नगरपालिकासँगको सहकार्यमा ७०० मिटर लामो जैविक तटबन्ध निर्माण भइरहेको हो। हालसम्म यस निर्माण कार्यको झण्डै आधा काम सम्पन्न भइसकेको छ।
पुनर्वास-७, परासनमा वर्षेनी दोदा नदीले पुर्याउने कटान र डुबानका कारण स्थानीय बासिन्दाहरूले ठुलो धनजनको क्षति बेहोर्दै आएका थिए। सोही समस्यालाई मध्यनजर गर्दै सुरु गरिएको यस तटबन्धका लागि पुनर्वास नगरपालिकाले ११ लाख ५७ हजार, एनएनएसडब्लुएले १४ लाख ९१ हजार, मर्सीकोर नेपालले १२ लाख ६ हजार र स्थानीय समुदायले १ लाख ३८ हजार बराबरको जनश्रमदान उपलब्ध गराएका छन्।
सान परियोजनाका संयोजक देवराज बडुले जैविक तटबन्ध स्थानीय स्रोतसाधनको प्रयोग गरी निर्माण गरिने भएकाले यो कम खर्चिलो र वातावरणमैत्री हुने बताउनुभयो। उहाँले यो तटबन्धले नदी कटानको जोखिम न्यूनीकरण गर्नुका साथै भविष्यमा हुनसक्ने ठुलो क्षति रोक्न ‘पूर्वकार्य’ को रूपमा महत्त्वपूर्ण भूमिका खेल्ने बताउनुभयो।
वर्षैपिच्छे कटानको चपेटामा परिरहेको उक्त स्थानमा जैविक प्रविधिको प्रयोग गरी तटबन्ध बनाउन थालिएपछि स्थानीयस्तरमा खुसीयाली छाएको छ। बाँस, बोरा र बालुवा जस्ता सामग्री प्रयोग गरी निर्माण भइरहेको यस तटबन्धले नदीको बहावलाई बस्ती र खेतीयोग्य जमिनतर्फ आउनबाट रोक्नेमा स्थानीयहरू विश्वस्त रहेका छन्।
Discussion about this post