कञ्चनपुर । कञ्चनपुरको दोधारा चाँदनी नगरपालिकाले बढ्दो गर्मी र तातो हावा (लु) को जोखिमबाट नगरबासीलाई जोगाउन विशेष कार्ययोजना निर्माणको प्रक्रिया सुरु गरेको छ। जलवायु परिवर्तनका कारण पछिल्ला वर्षहरूमा अत्यधिक गर्मी बढ्दै गएपछि नगरपालिकाले ‘हिट एक्सन प्लान’ अर्थात् तातो हावा कार्ययोजना बनाउन सरोकारवालाहरूसँग प्रारम्भिक छलफल थालेको हो।
नगर प्रमुख किशोर कुमार लिम्बुको अध्यक्षतामा भएको छलफलमा दोधारा चाँदनीका लागि गर्मीको जोखिमको सीमा (थ्रेसहोल्ड) समेत तय गरिएको छ। प्राविधिक विश्लेषण अनुसार यदि यस क्षेत्रको तापक्रम लगातार ३ दिनसम्म ३८.७ डिग्री सेल्सियस वा सोभन्दा बढी पुग्ने पूर्वानुमान भएमा त्यसलाई ‘हिट वेभ’ (तातो हावाको लहर) मानिने र सोही अनुसारका आपतकालीन सुरक्षाका उपायहरू अपनाइने छ।
दोधाराचाँदनीका नगर प्रमुख किशोर कुमार लिम्बुले बढ्दो गर्मी र तातो हावाको लहर (लु) नगरबासीको स्वास्थ्यका लागि चुनौती बनिरहेको बताउनुभयो। उहाँले भन्नुभयो, “जलवायु परिवर्तनको असर हाम्रो पालिकामा प्रत्यक्ष देखिन थालेको छ। यस्तो अवस्थामा नागरिकको सुरक्षाका लागि ‘हिट एक्सन प्लान’ अत्यन्तै महत्त्वपूर्ण र समय सान्दर्भिक पहल हो।”
कार्ययोजनालाई तत्काल कार्यान्वयनमा लैजान नगरपालिकाले अब फोकल व्यक्ति चयन गर्ने, छुट्टै कार्यदल गठन गर्ने र टोल तथा समुदायस्तरमा पुगेर जनचेतनामूलक छलफल गर्ने तयारी गरेको छ। कार्यक्रममा नगर उपप्रमुख गंगा जोशी, प्रमुख प्रशासकीय अधिकृत, विभिन्न वडाका वडाध्यक्षहरू र विषयगत शाखाका प्रमुखहरूले तातो हावाको समयमा हुनसक्ने जनधनको क्षति कम गर्न पूर्वतयारीमै जोड दिनुपर्ने बताएका थिए।
नेपाल राष्ट्रिय समाज कल्याण संघ (एनएनएसडब्लुए) र मर्सीकोर नेपालको साझेदारीमा सञ्चालित ‘समुदायका लागि जलवायु उत्थानशील परियोजना’ (सिआरसी) अन्तर्गत गुड अर्थ कन्सल्टेन्सीको प्राविधिक सहयोगमा सञ्चालित यस कार्यक्रमले स्थानीय स्तरमा आपतकालीन व्यवस्थापन प्रणालीलाई थप बलियो बनाउने अपेक्षा गरिएको छ।
विशेष गरी गर्मीका कारण प्रभावित हुने विपन्न परिवार, बालबालिका र जेष्ठ नागरिकलाई लक्षित गरी कार्ययोजना कार्यान्वयन गरिने जनाइएको छ।
Discussion about this post