कञ्चनपुर । सुदूरपश्चिम विश्वविद्यालय अन्तर्गतको केन्द्रीय सामान्य विज्ञान विभाग र नेपाल राष्ट्रिय समाज कल्याण संघ (एनएनएसडब्लूए) बीच शैक्षिक, अनुसन्धान तथा सामुदायिक विकासमा सहकार्य गर्ने उद्देश्यले समझदारीपत्र (MOU) मा हस्ताक्षर गरिएको छ।
विश्वविद्यालयमा प्राप्त गरेको सैद्धान्तिक ज्ञानलाई व्यावहारिक अनुभवसँग जोड्न र विद्यार्थीहरूको क्षमता विकास गर्न यो सहकार्य गरिएको हो। समझदारीपत्रमा बिहीबार विश्वविद्यालयका केन्द्रीय सामान्य विज्ञान विभागका प्रमुख यज्ञराज जोशी र एनएनएसडब्लूएका कार्यकारी निर्देशक अशोक विक्रम जैरुले हस्ताक्षर गर्नुभएको छ।
सम्झौताअनुसार विद्यार्थीहरूले वातावरण संरक्षण, जलवायु परिवर्तन, विपद् जोखिम न्यूनीकरण, जल व्यवस्थापन, कृषि, स्वास्थ्य, शिक्षा तथा सामाजिक विकासका क्षेत्रमा प्रत्यक्ष रूपमा काम गर्ने अवसर प्राप्त गर्नेछन्। विशेष गरी विद्यार्थीहरूलाई एनएनएसडब्लूएद्वारा सञ्चालित परियोजना क्षेत्रहरूमा इन्टर्नशिप, फिल्डवर्क र अध्ययन भ्रमण गराइनेछ, जसबाट उनीहरूले समुदायमा आधारित वातावरणीय तथा विकास अभ्यासहरूलाई नजिकबाट बुझ्न सक्नेछन्।
सम्झौतामा संयुक्त अनुसन्धानलाई प्राथमिकता दिइएको छ। विद्यार्थी र एनएनएसडब्लूएको प्राविधिक टोलीले डेटा संकलन, विश्लेषण, प्रतिवेदन तयारी तथा नीतिगत वकालतमा सहकार्य गर्नेछन्। साथै विद्यार्थीहरूको क्षमता अभिवृद्धिका लागि जलवायु परिवर्तन अनुकूलन, जैविक विविधता संरक्षण, फोहर व्यवस्थापन र सामुदायिक परिचालनजस्ता विषयमा तालिम तथा सेमिनारहरू आयोजना गरिनेछ।
एनएनएसडब्लूएका कार्यकारी निर्देशक अशोक विक्रम जैरुले समुदायस्तरमा सकारात्मक परिवर्तन ल्याउन र दिगो विकासका लक्ष्यहरू हासिल गर्न यो सहकार्य कोशेढुङ्गा सावित हुने विश्वास व्यक्त गर्नुभयो। उहाँले विद्यार्थीहरूको ऊर्जा र संस्थाको अनुभव मिलेर सुदूरपश्चिमको दिगो विकास र वातावरणीय संरक्षणमा योगदान पुग्ने बताउनुभयो।
सुदूरपश्चिम विश्वविद्यालयका केन्द्रीय सामान्य विज्ञान विभागका प्रमुख यज्ञराज जोशीले यो समझदारीले शैक्षिक क्षेत्र र विकासका साझेदारहरूबीच हुनुपर्ने समन्वयको राम्रो उदाहरण पेश गरेको बताउनुभयो। उहाँले यस्ता साझेदारीले भविष्यमा विद्यार्थीहरूका लागि रोजगारीका अवसरहरू सिर्जना गर्न र उनीहरूलाई बजारको माग अनुसार दक्ष बनाउन मद्दत पुग्ने बताउनुभयो।
त्यस्तै विश्वविद्यालयका विज्ञान तथा प्रविधि संकायका डीन डा. प्रेम सिंह साउदले विश्वविद्यालयको पढाइलाई प्रयोगात्मक अनुभवसँग जोड्दा मात्रै दक्ष जनशक्ति उत्पादन हुने बताउनुभयो। उहाँले यस्ता साझेदारीले विद्यार्थीहरूलाई किताबी ज्ञानसँगै कार्यक्षेत्रको वास्तविक अनुभव दिलाउने र भविष्यमा बजारको माग अनुसार रोजगारीका अवसरहरू प्राप्त गर्न थप सहज हुने उल्लेख गर्नुभयो।
उक्त समझदारीपत्र पाँच वर्षका लागि लागू रहने बताइएको छ। कार्यक्रममा विश्वविद्यालयका प्राध्यापकहरू तथा एनएनएसडब्लूएका विभिन्न परियोजनाका प्रमुख तथा प्रतिनिधिहरूको उपस्थिति रहेको थियो।
Discussion about this post