दोदा नदीको कटान रोक्न पुनर्वासको परासनमा जैविक तटबन्ध निर्माण सुरु

कञ्चनपुर । कञ्चनपुरको पुनर्वास नगरपालिका वडा नम्बर -७ परासनमा जैविक तटबन्ध निर्माणको कार्य थालिएको छ। वर्षेनी दोदा नदीको कटान र डुबानको समस्या भोगिरहेका परासन क्षेत्रका स्थानीयहरूलाई जैविक तटबन्ध निर्माण कार्यपछि ठूलो राहत मिल्ने अपेक्षा गरिएको छ।

मर्सीकोर नेपाल, नेपाल राष्ट्रिय समाज कल्याण सङ्घ (एनएनएसडब्लुए) र द कोकाकोला फाउन्डेसनद्वारा सञ्चालित ‘नेपालमा पूर्वानुमानमा आधारित पूर्वकार्यको सुदृढिकरण’ (सान) परियोजना अन्तर्गत पुनर्वास नगरपालिका संगको सहकार्यमा ७०० मिटर लामो जैविक तटबन्ध निर्माण कार्य सुरु गरिएको हो।

सान परियोजनाका संयोजक देवराज बडुले जैविक तटबन्ध स्थानीय स्रोतसाधनको प्रयोग गरी निर्माण गरिने भएकाले यो कम खर्चिलो र वातावरणमैत्री हुने बताउनुभयो। उहाँले यो तटबन्धले नदी कटानको जोखिम न्यूनीकरण गर्नुका साथै भविष्यमा हुनसक्ने ठुलो धनजनको क्षति रोक्न पूर्वकार्यको रूपमा महत्त्वपूर्ण भूमिका खेल्ने उल्लेख गर्नुभयो।

वर्षैपिच्छे कटानको चपेटामा परिरहेको उक्त स्थानमा जैविक प्रविधिको प्रयोग गरी तटबन्ध बनाउन थालिएपछि स्थानीयस्तरमा खुसीयाली छाएको छ। तटबन्धले नदीको बहावलाई बस्ती र खेतीयोग्य जमिनतर्फ आउनबाट रोक्ने विश्वास गरिएको छ।