कञ्चनपुर । नेपालमा प्रि-मनसुनको सिजन सुरु भएसँगै देशभर मेघगर्जन, हावाहुरी र चट्याङको जोखिम अत्याधिक बढेको छ। चट्याङ परी मानवीय क्षति हुने गरेका घटनाहरूलाई मध्यनजर गर्दै राष्ट्रिय विपद् जोखिम न्यूनीकरण तथा व्यवस्थापन प्राधिकरणले विशेष सतर्कता अपनाउन अनुरोध गरेको छ।
प्राधिकरणले नागरिकहरूको सुरक्षाका लागि चट्याङ परिरहेका बेला घरबाहिर हुँदा ‘के गर्ने र के नगर्ने’ भन्नेबारे निम्न लिखित निर्देशिका जारी गरेको छ:
चट्याङ परिरहेका बेला घरबाहिर हुँदा के गर्ने?
आकाशमा बिजुली चम्किन थालेर गड्याङगुडुङ गर्न थालेपछि सतर्क हुने।
नजिकै कुनै घर संरचना भए भित्र गइहाल्ने।
सुरक्षित ओत नभेटे टाउको दुबै घुँडाको बीचमा राखेर दुबै हातले खुट्टा समाउने र खुट्टाको पन्जाले भुइँमा टेकेर दुबै कुर्कुच्चा जोडेर टुक्रुक्क बसी निहुरेर शरीरलाई जतिसक्दो सानो बनाई कान थुनेर बस्ने।
समूहमा भए सबैजना छुट्टिएर टाढा-टाढा बस्ने। यसो गर्दा धेरैजना हताहत हुनबाट जोगिन सकिन्छ।
खुल्ला क्षेत्र वा जङ्गलमा भए सम्भव भएसम्म होचो स्थान वा खाँचमा गएर बस्ने।
के नगर्ने?
रुख वा बिजुली र फोनका पोलमुनि वा टावरनजिक नबस्ने। छाता नओढ्ने। खेतबारीमा काम गरिरहेको भए बन्द गर्ने।खोला, पोखरी वा स्विमिङ पुलमा भए तुरुन्त बाहिर निस्किने।माछा मार्ने कार्य तथा ऱ्याफ्टिङ नगर्ने।
बिजुली र फोनको अग्लो खम्बा, अग्लो भवन, ठूलो रुख नजिक नबस्ने।
साइकल वा मोटरसाइकलमा भए तुरुन्त छेउ लगाई उत्रने।
धातुको कुनै पनि वस्तु, सवारी साधन वा उपकरण नछुने।
यसका साथै, आफ्नो स्थानको मौसम सम्बन्धी जानकारी लिन चाहनेले टोल फ्री नम्बर ११५५ मा सम्पर्क गर्न सकिन्छ। त्यस्तै आपत्कालीन अवस्थामा राहत तथा उद्धारका लागि टोल फ्री नम्बर ११४९ मा तुरुन्त सम्पर्क गर्न सकिन्छ।
Discussion about this post