काठमाडौँ । आज देशभर विभिन्न कार्यक्रम गरी राष्ट्रिय प्रजातन्त्र दिवस मनाइँदैछ। दिवसका अवसरमा सरकारले सार्वजनिक बिदा दिएको छ। २००७ साल फागुन ७ गते एकतन्त्रीय जहानियाँ राणा शासनको अन्त्य भई देशमा प्रजातन्त्र स्थापना भएको ऐतिहासिक दिनको सम्झनामा हरेक वर्ष यो दिवस मनाउने गरिन्छ। यही दिनको आधारमा २०४६ साल चैत २६ गते प्रजातन्त्र पुनःस्थापना भएको थियो भने त्यसकै निरन्तरतामा २०६३ साल वैशाख ११ गते लोकतन्त्र स्थापना भएको थियो।
यस ऐतिहासिक यात्राको परिणामस्वरूप २०६५ साल जेठ १५ गते पहिलो संविधानसभाले नेपाललाई संघीय लोकतान्त्रिक गणतन्त्रात्मक देशका रूपमा घोषणा गरेको थियो। त्यसपछि दोस्रो संविधानसभाले २०७२ साल असोज ३ गते संविधान जारी गरी कार्यान्वयनमा ल्याएको थियो। यी सबै राजनीतिक परिवर्तनहरूको आधारशिला फागुन ७ गतेको प्रजातन्त्र स्थापनालाई मानिन्छ, त्यसैले पनि यो दिवस विशेष महत्त्वका साथ मनाइँदै आएको छ।
प्रजातन्त्रकै जगमा संघीय लोकतान्त्रिक गणतन्त्र स्थापना भए पनि नागरिक अपेक्षाअनुसार सुशासन, समृद्धि र स्थायित्व प्राप्त हुन नसकेको भन्दै गुनासा र असन्तुष्टि बढिरहेका छन्। यही असन्तुष्टिको पृष्ठभूमिमा गत भदौ २३ र २४ गते नवयुवाहरूले विद्रोह गरेका थिए।
उक्त घटनापछिको विशेष राजनीतिक परिस्थितिमा आउँदो फागुन २१ गते प्रतिनिधिसभा सदस्य निर्वाचन हुन लागेको छ। प्रजातन्त्र दिवस मनाइरहँदा लोकतान्त्रिक मूल्य–मान्यता सुदृढ गर्दै जनआकांक्षा पूरा गर्ने दिशामा सबै पक्ष जिम्मेवार बन्नुपर्ने आवश्यकता औँल्याइएको छ।
Discussion about this post