कञ्चनपुर । कञ्चनपुरको सार्क एजुकेसन फाउन्डेसनले आफ्नो स्थापनाको ८औं वार्षिकोत्सव भव्य रूपमा मनाउने तयारी गरेको छ।
उक्त विशेष समारोहमा नेपाली राष्ट्रिय गानका रचनाकार व्याकुल माइला (प्रदीप कुमार राई) को प्रमुख आतिथ्यता रहने भएको छ। विगत आठ वर्षदेखि गुणस्तरीय शिक्षा र शैक्षिक सुधारका क्षेत्रमा निरन्तर योगदान पुर्याउँदै आएको यस फाउन्डेसनले आफ्नो उत्सवलाई एक विशिष्ट राष्ट्रिय व्यक्तित्वको उपस्थितिमा यादगार बनाउन लागेको हो।
कार्यक्रममा व्याकुल माइलाको आगमनले विद्यार्थीहरूमा राष्ट्रियताको भावना जागृत गराउनुका साथै उनीहरूलाई सिर्जनशील कार्यमा लाग्न थप प्रेरणा मिल्ने सार्क एजुकेसन फाउन्डेसनका कार्यकारी निर्देशक लक्ष्मण बस्नेतले बताउनुभयो।
कार्यक्रममा फाउन्डेसनले आफ्ना विगतका शैक्षिक उपलब्धिहरूको समीक्षा गर्नुका साथै जेहेन्दार विद्यार्थी र शिक्षा क्षेत्रमा महत्त्वपूर्ण योगदान पुर्याउने व्यक्तित्वहरूलाई सम्मान गर्ने कार्यक्रम समेत तय गरेको छ।
Discussion about this post