कञ्चनपुरको दोधाराचाँदनीमा २० दिने डिजिटल मार्केटिङ तालिम सम्पन्न

कञ्चनपुर । कञ्चनपुरको दोधाराचाँदनी नगरपालिकामा २० दिनसम्म सञ्चालित डिजिटल मार्केटिङ तालिम सम्पन्न भएको छ। नगरपालिकाले आयोजना गरेको उक्त तालिम साक डिजिटल युनिभर्सिटी प्रालिको प्राविधिक सहयोगमा सञ्चालन गरिएको थियो।

समापन कार्यक्रमका प्रमुख अतिथि एवम् दोधाराचाँदनी नगरपालिकाका नगर प्रमुख किशोर कुमार लिम्बुले नगरपालिकाले सञ्चालन गर्ने तालिमहरूमध्ये सबैभन्दा बढी सहभागिता र आकर्षण यसै तालिममा देखिएको बताउनुभयो। उहाँले अहिलेको डिजिटल युगमा यस्ता सीपहरू युवाहरूलाई स्वरोजगार बनाउन निकै सहयोगी हुने विश्वास व्यक्त गर्दै सिकेको ज्ञानलाई व्यवहारमा उतार्न सहभागीहरूलाई आग्रह समेत गर्नुभयो।

तालिमको प्राविधिक पक्षबारे जानकारी दिँदै साक डिजिटल युनिभर्सिटी प्रालिका प्रबन्ध निर्देशक गणेश दत्त जोशीले २० दिनको अवधिमा सहभागीहरूलाई फेसबुक मार्केटिङ, युट्युब अप्टिमाइजेसन र ग्राफिक डिजाइन लगायतका आधारभूत तथा व्यावसायिक विषयहरूमा प्रशिक्षण दिइएको बताउनुभयो। सहभागीहरूले छोटो समयमै डिजिटल प्लेटफर्मको प्रयोग गरी आयआर्जन गर्न सक्ने गरी सीप हासिल गरेकोमा उहाँले खुसी व्यक्त गर्नुभयो।

तालिममा नगरपालिकाका ३८ जना प्रशिक्षार्थीहरूको सहभागिता रहेको थियो। तालिमले स्थानीय स्तरमा रहेका व्यावसायिक सम्भावनाहरूलाई प्रविधिको माध्यमबाट विश्व बजारसम्म पुर्‍याउन युवाहरूलाई सक्षम बनाउने अपेक्षा गरिएको छ।