एनएनसडब्लुएद्वारा सन् २०२५ को समीक्षा, २०२६ का लागि नयाँ रणनीति तय

कञ्चनपुर । नेपाल राष्ट्रिय समाज कल्याण सङ्घ (एनएनसडब्लुए) ले सन् २०२५ मा सञ्चालित आफ्ना सम्पूर्ण परियोजनाहरूको उपलब्धि समीक्षा गर्दै आगामी वर्ष २०२६ का लागि नयाँ रणनीति तय गरेको छ।

संस्थाको केन्द्रीय कार्यालयमा आयोजित समीक्षा कार्यक्रममा विगत एक वर्षमा भए–गरेका कार्यहरू, हासिल भएका उपलब्धि र आगामी कार्यदिशाबारे गहन छलफल गरिएको हो।

समीक्षा कार्यक्रममा संस्थाद्वारा सञ्चालित विभिन्न परियोजनाका संयोजकहरूले आ–आफ्नो परियोजनाको कार्य प्रगति विवरण प्रस्तुत गरेका थिए। प्रस्तुतिकरणका क्रममा संयोजकहरूले २०२५ मा लक्षित समूहसम्म पुग्न सफल भएका कार्यक्रमहरू, समुदायमा देखिएको सकारात्मक प्रभाव र कार्यान्वयनका क्रममा भोग्नुपरेका चुनौतीहरूबारे जानकारी गराएका थिए। छलफलमा “कुन कार्यलाई कसरी अझ प्रभावकारी बनाउन सकिन्थ्यो” भन्ने विषयमा आत्मसमीक्षा गर्दै आगामी दिनमा सुधार गर्ने प्रतिबद्धता समेत जनाइएको थियो।

कार्यक्रममा बोल्दै नेपाल राष्ट्रिय समाज कल्याण सङ्घ (एनएनसडब्लुए) का कार्यकारी निर्देशक अशोक विक्रम जैरुले संस्थाले विगतमा हासिल गरेका उपलब्धिहरू उत्साहजनक रहेको बताउनुभयो। उहाँले भन्नुभयो, “हामीले २०२५ मा थुप्रै महत्त्वपूर्ण माइलस्टोनहरू पार गरेका छौँ। २०२६ मा हामी प्रविधि, सुशासन र समुदायको वास्तविक आवश्यकतालाई केन्द्रमा राखेर अझ परिष्कृत ढंगले अगाडि बढ्ने रणनीति तयार गरिरहेका छौँ।” उहाँले सबै परियोजनाहरूलाई थप नतिजामुखी बनाउन निर्देशन समेत दिनुभयो।

त्यस्तै, कार्यक्रमको अध्यक्षता गरिरहनुभएकी एनएनसडब्लुएकी अध्यक्ष माया देवी सार्कीले संस्थाले सधैँ समाजका पछाडि पारिएका वर्ग र समुदायको उत्थानका लागि काम गर्दै आएको उल्लेख गर्नुभयो। उहाँले भन्नुभयो, “परियोजनाहरूको सफल कार्यान्वयन नै संस्थाको सफलता हो। आगामी वर्ष २०२६ का लागि तय गरिने रणनीतिले अझ बढी प्रभावकारी र दिगो विकासका लक्ष्यहरू पछ्याउनेछ।”

सुदृढ परियोजनाका संयोजक राजकुमार सुनारले सन् २०२५ मा परियोजनामार्फत समुदायस्तरमा उल्लेखनीय परिवर्तन देखिन थालेको बताउनुभयो। उहाँले भन्नुभयो, “सुदृढ परियोजनाले विशेष गरी विपन्न तथा जोखिममा रहेका समुदायको संस्थागत क्षमता अभिवृद्धि र जीविकोपार्जन सुधारमा सकारात्मक परिणाम देखाएको छ। आगामी वर्ष २०२६ मा समुदायको स्वामित्व बढाउने, स्थानीय तहसँगको समन्वयलाई अझ मजबुत बनाउने र दिगोपनामा केन्द्रित कार्यक्रम सञ्चालन गर्ने हाम्रो योजना छ।”

कार्यक्रममा सहभागीहरूले २०२६ का लागि नयाँ कार्ययोजना बनाउँदा शिक्षा, स्वास्थ्य, जीविकोपार्जन र सामाजिक न्यायका क्षेत्रमा थप नवीन कार्यक्रमहरू समावेश गर्नुपर्ने सुझाव दिएका थिए। संस्थाले समीक्षाबाट प्राप्त पृष्ठपोषणलाई आधार मानी २०२६ को वार्षिक कार्ययोजनालाई अन्तिम रूप दिने जनाएको छ।