कञ्चनपुर । पछिल्लो समय कञ्चनपुरमा सञ्चारकर्मी तथा सञ्चारमाध्यमका विषयमा सार्वजनिक रूपमा व्यक्त गरिएका केही अभिव्यक्ति र टिकाटिप्पणीप्रति नेपाल पत्रकार महासंघ शाखा कञ्चनपुरले गम्भीर ध्यानाकर्षण भएको जनाएको छ।
महासंघले विश्वसनीय, उत्तरदायी, स्वच्छ, जवाफदेही तथा मर्यादित पत्रकारिता पेशामा संलग्न सञ्चारकर्मी र सञ्चारमाध्यमको सधैँ पक्षमा रहेको स्पष्ट पारेको छ। तर पत्रकारिता पेशाको आवरणमा धम्की दिने, गलत क्रियाकलाप गर्ने, पत्रकार आचारसंहिता विपरीत गतिविधि सञ्चालन गर्ने तथा व्यक्तिगत स्वार्थ केन्द्रित अनैतिक कार्यमार्फत पत्रकारिता पेशालाई बदनाम गर्ने प्रवृत्तिप्रति महासंघले आपत्ति जनाएको छ।
नेपाल पत्रकार महासंघ शाखा कञ्चनपुरका अनुसार यस्ता पेशागत मर्यादा र आचारसंहिता विपरीत गतिविधि गर्ने व्यक्तिहरूलाई महासंघको विधानअनुसार कारबाही गरिनेछ। साथै पत्रकारिता र पत्रकारको बदनाम हुने किसिमका अराजक, आपत्तिजनक तथा उच्छृङ्खल गतिविधि नगर्न र नगराउन महासंघले सबै सञ्चारकर्मी तथा सञ्चारमाध्यमलाई सचेत गराएको छ।
महासंघले पत्रकार वा पत्रकारितासँग सम्बन्धित कुनै गुनासो भएमा प्रमाणसहित नेपाल पत्रकार महासंघ शाखा कञ्चनपुर, प्रेस काउन्सिल नेपाल वा सम्बन्धित निकायमा निवेदन दिन अनुरोध गरेको छ। अनावश्यक टिकाटिप्पणी गरी सम्पूर्ण पत्रकारिता पेशालाई अपमानित गर्ने कार्य समाधानको उपाय नभएको महासंघको भनाइ छ।
महासंघले प्रमाणका आधारमा पत्रकारिता पेशाको आवरणमा गलत क्रियाकलाप गर्ने पत्रकार वा सञ्चारमाध्यममाथि कारबाही गराउन आवश्यक सहयोग गर्ने प्रतिबद्धता व्यक्त गरेको छ। साथै व्यक्तिगत स्वार्थका कारण प्रमाणबिहीन, मनगढन्ते तथा मिथ्या आरोप लगाएर पत्रकार र पत्रकारितालाई बदनाम नगर्न सबैमा आग्रह गरिएको छ।
नेपाल पत्रकार महासंघ शाखा कञ्चनपुरले लोकतान्त्रिक व्यवस्थामा बोल्ने र लेख्ने अधिकार भए पनि असभ्य र छाडा अभिव्यक्ति स्वीकार्य नहुने उल्लेख गर्दै सभ्य आलोचनालाई जिम्मेवार नागरिकको पहिचानका रूपमा लिनुपर्ने धारणा व्यक्त गरेको छ। समाज र राष्ट्रको दिगो विकासका लागि सबै क्षेत्रबीच सहकार्य, संयम र एकता आवश्यक रहेको भन्दै महासंघले सबै सञ्चारकर्मीलाई पत्रकार आचारसंहिता कडाइका साथ पालना गर्न अनुरोध गरेको छ।
नेपाल पत्रकार महासंघ शाखा कञ्चनपुरका सचिव कुन्दन पाण्डेयले पत्रकारिता पेशाको आवरणमा हुने गलत गतिविधिका कारण सम्पूर्ण पत्रकार समुदाय बदनाम हुन नदिन महासंघ सजग रहेको बताए। उनले पत्रकार आचारसंहिता विपरीत कार्य गर्ने जो–कोहीमाथि प्रमाणका आधारमा कारबाही गर्न महासंघ तयार रहेको स्पष्ट पारे। साथै उनले व्यक्तिगत असन्तुष्टि वा स्वार्थका कारण प्रमाणबिहीन आरोप लगाएर पत्रकारिता पेशालाई बदनाम नगर्न आग्रह गर्दै सभ्य आलोचना र जिम्मेवार अभिव्यक्तिले मात्र समाजमा सकारात्मक परिवर्तन सम्भव हुने धारणा व्यक्त गरे।
Discussion about this post