बर्दगोरियामा एनएमबि लघुवित्तद्वारा मृत्यु दाबी बीमा रकम हस्तान्तरण

कैलाली । कैलालीको बर्दगोरिया गाउँपालिका–२ कुम्बियाका हरसिंह डगौरा थारुको निधनपछि उनका परिवारलाई एनएमबि लघुवित्त वित्तीय संस्था लि.ले मृत्यु दाबी बीमा रकम प्रदान गरेको छ। एनएमबि लघुवित्तका जोशिपुर शाखाका प्रतिनिधि टोलीले मृतकका परिवारलाई घरमै पुगेर चेक हस्तान्तरण गरेको हो।

२०७९ वैशाख २१ गते संस्थाबाट सात लाख रुपैयाँ कर्जा लिएका डगौरा थारुको कर्जाको बाँकी साँवा र ब्याज गरी २ लाख १० हजार रुपैयाँ कट्टी गरिएको थियो। बाँकी मृत्यु दाबी बीमा वापत रु. ५,२०,२४२ को चेक मृतककी श्रीमती सेम दुलारी डगौरा थारुलाई हस्तान्तरण गरिएको एनएमबि लघुवित्तले जनाएको छ।

बीमा रकम हस्तान्तरण कार्यक्रममा कुम्बियाका समाजसेवी तथा स्थानीय अगुवा व्यक्तिहरुको उपस्थिति रहेको थियो। कार्यक्रममा एनएमबि लघुवित्तका सुदूरपश्चिम प्रदेशीय प्रबन्धक राजेश ठकुल्ला, शाखा प्रमुख हेमा चौधरी तथा लेखापाल सुनील पाण्डेयले संयुक्त रूपमा चेक हस्तान्तरण गरे।

कार्यक्रममा बोल्दै समाजसेवी दीपक बम र सन्तराम थारुले बैंक तथा वित्तीय संस्था समुदायको आर्थिक उत्थानको प्रमुख आधार भएको उल्लेख गर्दै, लघुवित्तले समाज–जीवनस्तर उकास्न महत्वपूर्ण योगदान दिइरहेको बताए। साथै, व्यक्तिगत स्वार्थ पुरा गर्न उच्छृङ्खल समूहले फैलाउँदै आएका ‘कर्जा तिर्न नपर्ने’ भ्रामक प्रचारमा नफस्न पनि आग्रह गरे।

लघुवित्त वित्तीय संस्था जनताको बचत तथा कर्जाबाट सञ्चालन हुने भएकाले सबैले इमानदारीपूर्वक कर्जा व्यवस्थापन र भुक्तानीमा सचेत रहनुपर्ने समाजसेवीहरूले जोड दिए।

कार्यक्रममा एनएमबि लघुवित्त जोशिपुर शाखाका शाखा प्रमुख हेमा चौधरी र लेखापाल सुनील पाण्डेयको पनि उपस्थिति रहेको थियो।