कञ्चनपुर । अखिल नेपाल फुटबल संघ (एन्फा) को निर्देशन र दक्षिण एसियाली फुटबल महासंघ (साफ) को कार्यक्रम अनुसार नेपालको यू-१७ महिला फुटबल टोलीको तयारीका लागि कञ्चनपुर जिल्लामा यू-१७ महिला खेलाडी छनोट कार्यक्रम सम्पन्न भएको छ। शनिबार महेन्द्रनगरस्थित खुलामञ्चमा आयोजित यस कार्यक्रममा जिल्लाभरबाट ३० जना खेलाडी सहभागी थिए।
कञ्चनपुर जिल्ला फुटबल संघका महासचिव नितेश रावलका अनुसार, छनोटमा सहभागी ३० जना खेलाडीमध्ये उत्कृष्ट प्रदर्शन गर्ने १२ जनालाई अगाडिको प्रक्रियाका लागि सिफारिस गरिएको छ। यी खेलाडीहरूले अब राष्ट्रिय यू-१७ महिला फुटबल टोलीमा समावेश हुने अवसर पाउनेछन्, जुन टोलीले भुटानको थिम्पुमा २०८२ भदौ ४ गतेदेखि १५ गतेसम्म आयोजना हुने साफ यू-१७ च्याम्पियनसिप २०२५ मा सहभागिता जनाउनेछ।
छनोट कार्यक्रममा सुदूरपश्चिम प्रदेश फुटबल संघका अध्यक्ष दिनेश श्रेष्ठ, प्रदेश फुटबल संघका सदस्य गोपाल चन्द, जिल्ला फुटबल संघका महासचिव नितेश रावल, एन्फा प्रशिक्षक पुष्कर शाही, भरत महता, हिमाल मल्ल, लोक पातली, नेपाली राष्ट्रिय फुटबल टोलीका पूर्व खेलाडी टेकेन्द्र थापा लगायत संघका पदाधिकारी सदस्य र खेलप्रेमीहरूको उपस्थिति रहेको थियो।
कञ्चनपुर जिल्लाको दक्षिणी क्षेत्र पुनर्वास र बेदकोट लगायतका ठाउँबाट छनोटमा सहभागी भएका खेलाडीहरूमध्ये मंगला व्याडी, पवित्रा कुमारी सार्की, लक्ष्मी खड्का, आरसी बि.के., बिबिसा विष्ट, आसिका खड्का, डम्मरी व्याडी, हिमा केशी, अनुका शाही, स्मृती थापा, आकृती शाही र प्रतिक्षा केशी छनोटमा पर्न सफल भएका छन्। यस छनोटले कञ्चनपुर जिल्लामा महिला फुटबलको विकासमा महत्वपूर्ण योगदान पुर्याउने विश्वास गरिएको छ।
Discussion about this post