कञ्चनपुर । नेपालको शैक्षिक इतिहासमै एक महत्त्वपूर्ण कदम चाल्दै, कञ्चनपुरमा रहेको सार्क एजुकेसन फाउन्डेसनले गरिब तथा विपन्न विद्यार्थीहरूलाई शिक्षामा पहुँच पुर्याउने लक्ष्यका साथ विशेष छात्रवृत्ति योजना घोषणा गरेको छ।
शिक्षा क्षेत्रमा केही नयाँ गर्ने सोचका साथ स्थापित सार्क एजुकेसन फाउन्डेसनले आफ्नो कार्यक्षेत्रभित्र पर्ने कञ्चनपुरका वेदकोट नगरपालिका, भीमदत्त नगरपालिका र दोधारा चाँदनी नगरपालिकाका विद्यार्थीहरूका लागि यो योजना ल्याएको हो।
कक्षा ११ मा नयाँ भर्ना हुने गरिब, विपन्न, एकल महिला, दलित तथा आदिवासी समुदायका बालबालिकाहरू आर्थिक अभावका कारण पढाइबाट वञ्चित हुन नपरोस् भन्ने उद्देश्यले यो छात्रवृत्ति प्रदान गरिने फाउन्डेसनका कार्यकारी निर्देशक डा. लक्ष्मण बस्नेतले जानकारी दिनुभएको छ।
उहाँका अनुसार, प्रत्येक वडाबाट ५/५ जना विद्यार्थीलाई ४० प्रतिशतदेखि १०० प्रतिशतसम्म छात्रवृत्ति दिने घोषणा गरिएको छ। यस योजनाअन्तर्गत तीन वटै पालिकाका ३९ वडाका वडा कार्यालयको सिफारिसमा जम्मा १९५ जना विद्यार्थी लाभान्वित हुनेछन्। यसमध्ये, ३९ जना विद्यार्थीले शतप्रतिशत छात्रवृत्ति, ७८ जनाले ५० प्रतिशत छात्रवृत्ति र बाँकी ७८ जनाले ४० प्रतिशत छात्रवृत्ति प्राप्त गर्नेछन्।
फाउन्डेसनले यसअघि दिँदै आएको आन्तरिक छात्रवृत्तिलाई समेत निरन्तरता दिने जनाएको छ।
सार्क एजुकेसन फाउन्डेसनका प्रिन्सिपल सूर्य घिमिरेले प्रत्येक नागरिकको शिक्षामा समान पहुँच र देश विकासमा समान सहभागिता होस् भन्ने उद्देश्यले यो छात्रवृत्ति योजना सुरु गरिएको बताउनुभयो। उहाँले पढ्न चाहने तर आर्थिक अभावका कारण पढ्न नसकेका विद्यार्थीहरूलाई लक्षित गर्दै यो योजना लागू गरिएको बताउनुभयो।
त्यस्तै सार्क एजुकेसन फाउन्डेसनका प्लस टु संयोजक भागवत भट्टले देशको समृद्धिका लागि शिक्षाको समान पहुँच अपरिहार्य रहेको बताउनुभयो। उहाँले कुनै पनि विद्यार्थी आर्थिक कारणले पढाइबाट वञ्चित नहोस् भन्ने सुनिश्चित गर्न यो योजना ल्याइएको बताउनुभयो।
यो विशेष छात्रवृत्ति योजनाले कञ्चनपुरका दुर्गम तथा आर्थिक रूपले कमजोर विद्यार्थीहरूका लागि उच्च शिक्षा हासिल गर्ने ढोका खोल्ने विश्वास लिइएको छ। यसले शिक्षा क्षेत्रमा सकारात्मक परिवर्तन ल्याउनुका साथै समावेशी समाज निर्माणमा समेत महत्त्वपूर्ण भूमिका खेल्ने अपेक्षा गरिएको छ।
Discussion about this post