कञ्चनपुर । गृहमन्त्री रमेश लेखकले आफू राजनीतिक षड्यन्त्रको एम्बुसमा परेको बताउनुभएको छ।
बुधबार डडेल्धुरामा आयोजित पार्टी कार्यकर्ता भेटघाट कार्यक्रममा बोल्दै उहाँले वर्तमान सरकार र समीकरणलाई कमजोर पार्ने उद्देश्यले आफूविरुद्ध षड्यन्त्र गरिएको दाबी गर्नुभयो।”एउटा कार्यालयका कर्मचारीमाथि छानबिन हुँदा मन्त्रीलाई जोड्नुको नियत प्रष्टै छ,” गृहमन्त्री लेखकले भन्नुभयो। उहाँले अध्यागमनसम्बन्धी समस्या समाधानका लागि सरकार र प्रतिपक्षी दलबीच सहमति भई उच्चस्तरीय समिति बनेको समेत जानकारी गराउनुभयो।
सुदूरपश्चिमको विकासका लागि सरकार सबै तवरबाट लागिरहेको पनि उहाँले स्पष्ट पार्नुभयो।यसैगरी, गृहमन्त्री लेखकले वर्तमान सत्ता गठबन्धनलाई आगामी २०८४ सालसम्म निरन्तरता दिनुपर्नेमा जोड दिनुभयो। “कांग्रेस–एमाले गठबन्धन मुलुकको आवश्यकता हो,” उहाँले भन्नुभयो, “मैले हिजो पनि पार्टीको केन्द्रीय समिति बैठकमा ८४ सम्म यो गठबन्धनलाई निरन्तरता दिनुपर्छ भनेको छु।” सरकार बनेको एक वर्ष हुन लागेको प्रसंग उठाउँदै उहाँले भन्नुभयो, “अहिले सम्माननीय प्रधानमन्त्री केपी शर्मा ओलीज्यू हुनुहुन्छ, एक वर्षपछि हाम्रो सभापति आदरणीय नेता शेरबहादुर देउवा प्रधानमन्त्री बन्नुहुन्छ र ८४ को निर्वाचन देउवा दाइले नै गर्नुहुन्छ।”
गृहमन्त्री लेखकले गठबन्धनको कुनै विकल्प नभएको बताउँदै, “हाम्रो गतिविधि, क्रियाकलाप र काम कारबाही गठबन्धनको भावना अनुसार हुनुपर्छ” भन्नेमा जोड दिनुभयो।
Discussion about this post