ग्रामीण क्षेत्रको गौरव: दोगडाकेदारकी भावनाको एसईई सफलता, विद्यालय र परिवार हर्षित

बैतडी – बैतडी जिल्लाको दुर्गम मानिने दोगडा केदार गाउँपालिका–७ चडेपानी गाउँकी भावना भट्टले २०८१ को माध्यमिक शिक्षा परीक्षा (एसईई) मा ३.८० जीपीए ल्याएर विद्यालयको इतिहासमै कीर्तिमान कायम गरेकी छिन्। श्री भूमिराज माध्यमिक विद्यालयकी छात्रा भावना गाउँपालिका, जिल्ला र समग्र क्षेत्रका लागि शैक्षिक प्रेरणाको श्रोत बनेकी छिन्।

२०८१ सालको एसईई नतिजामा भावनाले दोगडा केदार गाउँपालिकाभरिका सबै विद्यार्थीलाई पछि पार्दै प्रथम स्थान हासिल गरिन्। यसैगरी, उनी समग्र बैतडी जिल्लामा पाँचौं स्थानमा रहन सफल भइन् भने छात्रातर्फ दोस्रो स्थान हासिल गरेर आफू, विद्यालय, परिवार र चडेपानी गाउँको नाम उच्च राखेकी छिन्।

विद्यालयका अनुसार भावना सानैदेखि पढाइमा तेज र मेहनती थिइन्। विद्यालयले जनाएअनुसार उनी अनुशासित, सधैं अभ्यास गर्ने र सकारात्मक सोच्ने स्वभावकी छात्रा हुन्। विद्यालयका हरेक शैक्षिक तथा अन्य गतिविधिहरूमा उनी अगाडि रहेर नेतृत्व लिने गर्थिन्।

भूमिराज माध्यमिक विद्यालयका प्रधानाध्यापक शङ्कर भट्टले भावनाको सफलताले विद्यार्थीमा अनुशासन र लगन भए मनले चिताएको कुरा हासिल गर्न सकिन्छ भन्ने प्रमाणित गरेको बताए। उनले भने, “भावना हाम्रो विद्यालयकी अनुशासित र लगनशील विद्यार्थी हुन्। उनको यो सफलताले विद्यार्थीको सर्वाङ्गीण विकासका लागि शिक्षक, विद्यार्थी र अभिभावक सबैको संयुक्त प्रयास आवश्यक छ भन्ने देखाएको छ।”

भावनालाई अङ्ग्रेजी विषयमा पूर्ण ४.० जीपीए ल्याउन सफल बनाएका अङ्ग्रेजी शिक्षक लक्ष्मी दत्त भट्टले ग्रामीण परिवेशबाट यतिको उत्कृष्ट नतिजा ल्याउनु प्रेरणादायी भएको बताए। उनले भने, “भावनाले अङ्ग्रेजी विषयमा गरेको मेहनत, अभ्यास र आत्मविश्वास देख्दा मलाई लाग्थ्यो– यो विषयमा उनी विशेष परिणाम ल्याउँछिन्। जब नतिजा आयो, त्यो पल मेरो लागि एकदमै खुसीको क्षण थियो।”

विद्यालय व्यवस्थापन समितिका अध्यक्ष सहदेब भट्टले भावनाको लगनशीलता र आत्मविश्वासको खुलेर प्रशंसा गर्दै उनको सफलताले विद्यालय परिवार र गाउँलेलाई नै गर्वको महसुस गराएको बताए। उनले भने, “भावनाले आफ्नो आत्मविश्वास र लगनशीलताको बलमा असम्भव लाग्ने कार्यलाई सम्भव बनाएकी छिन्। उनको यो उपलब्धिले हाम्रा अन्य विद्यार्थीहरूलाई पनि ठूलो प्रेरणा दिनेछ।”

भावनाको यस कीर्तिमानी उपलब्धिले चडेपानी गाउँमा मात्र नभई सम्पूर्ण दोगडा केदार गाउँपालिकामा शैक्षिक चेतनाको नयाँ लहर ल्याएको छ। उनको सफलताले विशेषगरी बालबालिका र किशोरीहरूलाई पढाइमा अगाडि बढ्नका लागि उत्प्रेरित गरेको छ।

भावनाका बुबा महेश शरण भट्ट, जो आफैं पनि शिक्षक हुन् उनले छोरीको सफलतामा खुसी व्यक्त गरे। उनले भने, “घरमा पढाइको सकारात्मक माहौल बन्यो भने बच्चाहरूले यस्तो नतिजा ल्याउन सक्छन्। भावनाले यो कुरा प्रमाणित गरेकी छ।” उनले अन्य अभिभावकहरूलाई पनि आफ्ना छोराछोरीको लागि घरमा उपयुक्त शैक्षिक वातावरण बनाउन आग्रह गरेका छन्।

भावनाको यो सफलता ग्रामीण क्षेत्रका विद्यार्थीका लागि एउटा ज्वलन्त उदाहरण बनेको छ, जसले उचित अवसर र निरन्तर प्रयास पाएमा कुनै पनि लक्ष्य हासिल गर्न सकिन्छ भन्ने सन्देश दिएको छ।