इरानमा समस्यामा परेका नेपालीहरुको उद्धारका लागि भारतले सहयोग गर्ने भएको छ । इरनामा रहेका १६ जना नेपालीहरुको उद्धारका लागि आफूले भारतीय सरकारसँग अनुरोध गरेको र भारतले स्वीकार गरेको परराष्ट्रमन्त्री आरजु राणाले जानकारी दिनुभयो । उहाँका अनुसार नेपाल सरकारको अनुरोधमा इरानमा रहेका नेपालीलाई इरानमा रहेको भारतीय दूतावासले उद्धार गर्ने छ ।
इरानमा रहेको भारतीय दुतावासले नेपालीको उद्धार गर्ने प्रक्रियाका लागि सूचना निकालेको र आफूहरुले पनि भारतीय दुतावासमा जान भनेको राणाले बताउनुभयो । इजरायल–इरान युद्धका कारण इरानमा रहेका नेपालीहरु समस्यामा परेका हुन् ।
भारतले पनि इरानबाट आफ्ना नागरिकहरुलाई स्वदेश फर्काइरहेको छ । इरानमा रहेका १६ जना नेपालीमध्ये अध्यागमनसम्बन्धी कानूनका कारण पाँच जना नेपाली इरानी जेलमा रहेकाले उनीहरुलाई पनि जेलमुक्त गरी स्वदेश फर्काउने पहल भइरहेको परराष्ट्र मन्त्रालयले जनाएको छ । उज्यालो अनलाइन बाट साभार
Discussion about this post