काठमाडौँ – गण्डकी प्रदेश सरकारले ‘राइड शेयरिङ नियमावली’ एक महिनाका लागि स्थगन गर्ने निर्णय गरेसँगै यातायात व्यवसायीले आन्दोलन फिर्ता लिएका छन्। यससँगै गएरातिदेखि नै देशभर सार्वजनिक गाडी पुनः सञ्चालनमा आएका छन्।
नेपाल यातायात व्यवसायी राष्ट्रिय महासङ्घका अध्यक्ष विजय स्वाँरले आन्दोलनका सबै कार्यक्रम तत्कालका लागि स्थगित गरिएको जानकारी दिनुभयो। गत सोमवार मध्यरातमा सरकार र व्यवसायीबीच भएको सहमति कार्यान्वयन नभएको भन्दै मङ्गलवार दिनभर सार्वजनिक गाडी ठप्प थिए। यसका कारण सोमवार र मङ्गलवार दुई दिन यात्रुले ठूलो सास्ती खेप्नुपरेको थियो।
मङ्गलवार बेलुका बसेको यातायात व्यवसायीको बैठकले आन्दोलन फिर्ता लिने निर्णय गरेको हो। गण्डकी प्रदेश सरकारले नियमावली स्थगन गरेपछि व्यवसायीले आन्तरिक छलफल गरी यो निर्णय लिएका हुन्।
प्रधानमन्त्री तथा मन्त्रिपरिषद् कार्यालयमार्फत गण्डकी प्रदेश सरकारसँग भएको सहमतिका आधारमा नियमावली स्थगन गरिएको हो। यो निर्णयले यातायात क्षेत्रमा देखिएको तनाव कम भएको छ।
Discussion about this post