नेपाली काँग्रेसलाई ३३ बुँदे माग पत्र : हिन्दु राष्ट्र पुनःस्थापना र सुशासनको माग

बैतडी – नेपाली काँग्रेस बैतडीको पार्टी कार्यालयमा आइतबार आयोजित एक विशेष कार्यक्रमका बिच नेपाली काँग्रेसका केन्द्रीय सभापति शेरबहादुर देउवालाई जिल्ला सभापति चतुर बहादुर चन्दमार्फत ३३ बुँदे माग पत्र बुझाइएको छ। माग पत्रमा सनातन हिन्दु राष्ट्र पुनःस्थापनासहित देश र जनताका समसामयिक मुद्दाहरूलाई समेटिएको छ।

अभियानका संयोजक अमरबहादुर टेरले यो माग पत्र देशभरका जनताको आवाजलाई समेटेर तयार पारिएको बताए। उनले भने, “अब राजनीतिक पार्टीहरूले गम्भीर भएर सोच्ने बेला आएको छ। देश, धर्म र जनताका मागलाई बेवास्ता गर्न सकिँदैन। पार्टीभित्र गहन छलफल गरी गल्तीहरू सच्याएर जनतामाझ युग सुहाउँदो एजेन्डा लिएर जानुपर्छ।” उनले थपे, “हामीले उठाएका यी ३३ बुँदे मागहरू कार्यान्वयन नभएसम्म हाम्रो अभियान निरन्तर जारी रहनेछ। देशभरका नेपाली काँग्रेससँग आबद्ध नेता–कार्यकर्तालाई यी मुद्दामा गम्भीर भएर सोच्न अनुरोध गर्दछु।”

माग पत्रमा सनातन हिन्दु राष्ट्र पुनःस्थापना, प्रदेश संरचना खारेजी, सुधारिएको लोकतन्त्र, पक्षपाती आरक्षण र अनावश्यक भत्ता खारेज, गाँजा खेतीको वैधानिकता, विज्ञान र प्रविधिमा आधारित आध्यात्मिक समाजवाद, स्वदेशी लगानी र उत्पादन, नेपालमै रोजगारीको व्यवस्था, विश्व स्तरीय पर्यटन व्यवसाय, जलविद्युत् उत्पादन, खानी उत्खनन, जडीबुटी प्रशोधन, दिगो विकास, श्री पशुपतिनाथ र काठमाडौँको महत्त्व, नैतिकवान् नेतृत्व, चुस्त सरकारी सेवा, निःशुल्क आधारभूत सेवा, विदेशी ऋणको भार हटाउने, विद्युतीय सवारी साधन, प्रत्यक्ष निर्वाचित कार्यकारी प्रधानमन्त्री, समानुपातिक निर्वाचन प्रणाली खारेज, हिन्दु सम्राट् र सनातन बोर्ड गठनजस्ता महत्त्वपूर्ण बुँदाहरू समावेश छन्।

यो माग पत्रले नेपाली काँग्रेसलाई देशको बदलिँदो परिस्थिति र जनताको आकाङ्क्षालाई सम्बोधन गर्न दबाब सिर्जना गरेको छ। अभियानका संयोजक टेरले यी मागहरूले देशमा सुशासन, समृद्धि र सांस्कृतिक पहिचानलाई बलियो बनाउन योगदान पुग्ने विश्वास व्यक्त गरे। उनले भने, “हाम्रो अभियान केवल माग प्रस्तुत गर्नमा सीमित छैन, यो जनताको चाहनालाई साकार बनाउने सङ्कल्प हो।”

कार्यक्रममा उपस्थित स्थानीय नेता र कार्यकर्ताहरूले यो माग पत्रलाई पार्टीको आगामी रणनीति र नीति निर्माणमा समावेश गर्नुपर्नेमा जोड दिए। नेपाली काँग्रेस बैतडीका सभापति चतुर बहादुर चन्दले माग पत्र केन्द्रीय नेतृत्वसमक्ष पुर्‍याउने प्रतिबद्धता व्यक्त गर्दै यी मुद्दाहरूमा गम्भीर छलफलको आवश्यकता रहेको बताए।

माग पत्रले नेपाली काँग्रेसलाई आफ्ना नीति र कार्यक्रमहरू पुनरावलोकन गरी जनताको भावनालाई समेट्ने अवसर प्रदान गरेको छ। अभियानले देशभरका काँग्रेस कार्यकर्ता र नेतृत्वलाई यो माग पत्रमाथि व्यापक बहस र कार्यान्वयनको पहल गर्न आह्वान गरेको छ।