कञ्चनपुर । साना किसान कृषि सहकारी संस्था लिमिटेड सुडाको २७ औँ वार्षिक साधारण सभा सम्पन्न भएको छ। सोमबार सम्पन्न कार्यक्रममा वेदकोट नगरपालिकाका नगर प्रमुख भोजराज बोहराको प्रमुख आतिथ्य रहेको थियो भने साना किसान कृषि सहकारी संस्था लिमिटेड सुडाका सञ्चालक समिति अध्यक्ष खगेश्वर प्रसाद पाण्डेको सभापतित्व रहेको थियो।
कार्यक्रममा बोल्दै नगर प्रमुख बोहराले साना किसान कृषि सहकारी वेदकोट नगरपालिकाकै ठुलो सहकारी भएकाले यसले हाम्रो नगर भित्र रहेका ससाना किसानहरूको पुँजीलाई सङ्कलन गरि उनीहरूको जीवनस्तर सुधार गर्नमा महत्वपूर्ण भूमिका खेलिरहेको भन्दै प्रशंसा गरे । उनले वास्तवमा किसानहरू साना नभई सबैभन्दा ठूला भएको बताए । उनले किसान र मजदुरहरूको मेहनत र परिश्रमले नै राज्यका सबै तहहरू सञ्चालन भैरहेको बताए । साथै उनले अब कृषिलाई परम्परागत भन्दा पनि वैज्ञानिक तवरले अगाडि बढाएर व्यावासीकरण गर्दै लैजानुपर्ने बताएका छन् ।
कार्यक्रममा सञ्चालक समितिका अध्यक्ष खगेश्वर प्रसाद पाण्डेले वार्षिक प्रगति प्रतिवेदन प्रस्तुत गर्नुभएको थियो भने मुख्य प्रबन्धक गीता भट्टले वार्षिक आर्थिक प्रतिवेदन प्रस्तुत गर्नुभएको थियो । यस्तै संस्थाको आन्तरिक लेखा परिक्षण प्रतिवेदन लेखा सुपरीवेक्षण समितिका संयोजक शङ्कर दत्त जोशी प्रस्तुत गर्नुभएको थियो । कार्यक्रममा संस्थाका उपाध्यक्ष रघुवर प्रशाद लेखकले स्वागत मन्तव्य राख्नुभएको थियो।
कार्यक्रमको सञ्चालन लेखा सुपरीवेक्षण समितिका सदस्य सिद्धराज ओझाले गरेका थिए। कार्यक्रममा ८ सय भन्दा बढी सेयर सदस्यको भव्य उपस्थिति रहेको संस्थाका पशु स्वास्थ्य प्राविधिक (संस्था सहायक) टेक बहादुर चन्दले बताएका छन्।
संस्थामा आर्थिक वर्ष २०८०/०८१ मा सञ्चालन रहेका विभिन्न बचत खाताहरूमा रू ७,२२,७०,९१०.५४/- र रू. ६, ४५, ३३, ०७६/- फिर्ता गरी वर्षको अन्त्यमा रू ७, ११, ४९, ९४४.७७/- निपेक्ष मौज्दात रहेको संस्थाले जनाएको छ।
