पप्पु गुरुङ्ग, कञ्चनपुर – कञ्चनपुरको दोधाराचाँदनी नगरपालिका क्षेत्रमा रहेको एक मात्रै क्याम्पस सञ्चालक समितिको अध्यक्षमा समाजसेवी अक्षरप्रेमी भरत दत्त भट्ट मनोनित भएका छन । दोधाराचाँदनी नगरपालिका ६ मा रहेको भानु बहुमुखी क्याम्पस सञ्चालक समितिको अध्यक्षमा समाजसेवी शिक्षा प्रेमी भट्ट मनोनित भएका हुन ।
त्रिभुवन विश्वविद्यालयको सम्बन्धन प्राप्त उक्त भानु बहुमुखी क्याम्पस सञ्चालक समितिको अध्यक्षमा भट्ट चयन भएको त्रिविले जनाएको छ । त्रिवि उपकुलपतिको कार्यालय योजना निर्देशनालयले क्याम्पसबाट सिफारिस भए बमोजिम प्राथमिकक्रमको आधारमा १७ माघ ०८० को निर्णय अनुसार अध्यक्षमा मनोनित गरिएका छन् ।
त्रिवि योजना निर्देशक प्रा.डा धुव्र कुमार गौतमद्वारा हस्ताक्षरित गरिएको मनोनित पत्रमा विधान अनुरूप कार्यभार सम्हाल्नुदेखि बधाई ज्ञापन गरिएको छ । भानु बहुमुखी क्याम्पस सञ्चालक समितिको अध्यक्षमा चयन भएका भरत दत्त भट्टले ग्रामीण भेगको उच्च शिक्षाको स्तरवृद्धि विकासका लागि आवश्यक पहल गर्ने प्रतिबद्धता जाहेर गरेका छन ।
नेकपा माओवादी केन्द्रका नेता समेत रहेका समाजसेवी भट्टले दिएको जिम्मेबारी अनुरूप कामकाज गर्नेदेखि सुदूरपश्चिम विश्वविद्यालयको आंगिक क्याम्पस बनाउन मुख्य भूमिका निर्वाह गर्ने बताए । ‘अहिले हाम्रो क्याम्पस त्रिविको सम्बन्धनबाट सञ्चालनमा छ, ‘उनले भने, ‘अब छिट्टै सुप विश्वविद्यालयको आंगिक बनाउँछौँ ।’
