कञ्चनपुर – कञ्चनपुरको वेदकोट नगरपालिकामा दोस्रो मेयर कप हुने भएको छ। असोज १५ गतेदेखि दोस्रो संस्करणको मेयर कप नगर स्तरीय पुरुष फुटबल प्रतियोगिता हुने भएको हो।
वेदकोट नगर खेलकुद समितिको आयोजनामा उक्त प्रतियोगिता हुन लागेको हो। प्रतियोगिताको प्रथम पुरस्कार रू ५० हजार नगद सहित ट्रफी, मेडल र प्रमाण पत्र रहेको छ भने द्वितीय पुरस्कार रू २५ हजार नगर सहित ट्रफी, मेडल र प्रमाण पत्र रहेको आयोजकले जनाएको छ।
प्रतियोगितामा वेदकोट नगरपालिकाका १० वटै वडाको सहभागिता रहने विश्वास लिएको वेदकोट नगर खेलकुद समितिका अध्यक्ष प्रजापति भट्टले बताए। नगरभित्रका फुटबल खेलाडीहरूको पहिचान गरी नगरस्तरीय टिम तयार गर्ने उद्देश्यले प्रतियोगिताको आयोजना गरिएको उनको भनाई रहेको छ। त्यस्तै उत्कृष्ट खेलाडी, उत्कृष्ट गोलरक्षक सहित विधागत रूपमा उत्कृष्ट हुने खेलाडीलाई समेत पुरस्कार प्रदान गरिने उनले जानकारी दिएका छन्। साथै उनले वेदकोट नगरपालिकाका सम्पूर्ण वडाका टिमहरूलाई सहभागी हुन आग्रह गरेका छन्।
त्यसैगरी आयोजक समितिका सदस्य राकेश बहादुर चन्दले खेलमैदान निर्माणदेखि प्रतियोगिताको सबै तयारी पूरा भएको जानकारी दिएका छन् । खेलकुदका कारण खेलाडीको स्वास्थ्यमा सकारात्मक परिवर्तन मात्रै नभएर यसबाट नगर, जिल्ला र राष्ट्रले गौरव गर्न सक्ने खेलाडी उत्पादन हुने उनको भनाई रहेको छ।
