काठमाडौं । नेपाल प्रिमियर लिग (एनपीएल) को तेस्रो संस्करणअन्तर्गत २४औँ खेलमा काठमाडौं गोर्खाजविरुद्ध सुदूरपश्चिम रोयल्सको ब्याटिङ धरापमा परेको छ।
कीर्तिपुरस्थित त्रिवि क्रिकेट मैदानमा टस हारेर पहिले ब्याटिङ गरेको सुदूरपश्चिमले पावरप्लेमा ४ विकेट गुमाउँदै मात्र २१ रन बनाएको छ।
सुदूरपश्चिमले पहिलो विकेटका रूपमा ओपनर स्कट कुगेलेइनलाई गुमाएको थियो। उनले एक छक्का प्रहार गरे पनि क्याच आउट भए। त्यसपछि क्रिजमा आएका ब्रान्डन म्याकमुलेन र इशान डकआउट भए। अर्का ओपनर विनोद भण्डारी पनि १ रन बनाएर एलबीडब्ल्यू आउट भए।
हाल क्रिजमा कप्तान दीपेन्द्रसिंह ऐरी ६ रन र आरिफ शेख ६ रन बनाएर खेलिरहेका छन्।
सुदूरपश्चिमको ब्याटिङ धरापमा पार्ने क्रममा काठमाडौंका जहानदाद खान र सन्तोष यादवले समान दुई–दुई विकेट लिएका छन्।
काठमाडौं गोर्खाजको यो छैटौँ लिग खेल हो भने सुदूरपश्चिम रोयल्सको सातौँ तथा अन्तिम लिग खेल हो। दुवै टोलीले यसअघि समान ८ अंक जोडिसकेका छन्।
आजको खेल जित्ने टोलीले प्लेअफमा आफ्नो स्थान सुरक्षित गर्नेछ।
Discussion about this post