काठमाडौं – नेपाल प्रिमियर लिग (एनपीएल) को तेस्रो संस्करणमा सुदूरपश्चिम रोयल्सले कर्णाली याक्सलाई ३९ रनले पराजित गर्दै प्रतियोगितामा तेस्रो जित निकालेको छ।
कीर्तिपुरस्थित त्रिवि क्रिकेट मैदानमा टस हारेर पहिले ब्याटिङ गरेको सुदूरपश्चिमले निर्धारित २० ओभरमा ६ विकेट गुमाएर १७६ रन बनाएको थियो। जवाफमा १७७ रनको लक्ष्य पछ्याएको कर्णालीले २० ओभरमा ७ विकेट गुमाएर १३७ रन मात्रै बनाउन सक्यो।
कर्णालीका लागि पहिलो खेल खेलेका डेविड मिलरले आक्रामक ब्याटिङ गर्दै ५५ बलमा ५ चौका र ७ छक्कासहित अविजित ९३ रन बनाए पनि टोलीलाई जिताउन सकेनन्। उनीबाहेक दीपकप्रसाद डुम्रेले १८ रन बनाउनु नै उल्लेखनीय रह्यो।
सुदूरपश्चिमका बलर स्कट केग्गुलिनले सर्वाधिक २ विकेट लिए। हेमन्त धामी, अनिल खरेल, दीपेन्द्रसिंह ऐरी, थारिन्दु रत्नायके र अविनाश बोहोराले समान १ विकेट हात पारे।
त्यसअघि सुदूरपश्चिमका लागि ओपनर सैफ जैबले सर्वाधिक ३५ रन बनाए। उनले २४ बलमा ४ चौका र १ छक्का प्रहार गरे। पहिलो विकेटका लागि जैब र विनोद भण्डारीले ६८ रनको साझेदारी गरेका थिए। विनोदले २२ बलमा २ चौका र २ छक्कासहित २८ रन बनाए।
त्यस्तै, ब्रान्डन म्याकमुलेनले २४, इशान पाण्डेले २३, थारिन्दु रत्नायकेले अविजित २२ तथा कप्तान दीपेन्द्रसिंह ऐरीले १० रन बनाए। स्कट केग्गुलिन १३ रनमा अविजित रहे।
कर्णालीका लागि मार्क वाटले २ विकेट लिए भने नन्दन यादव, हुसैन तलात, पवन सर्राफ र सूर्य तामाङले समान १ विकेट लिए।
यस जितसँगै सुदूरपश्चिमले ५ खेलबाट ६ अंक जोड्दै अंकतालिकाको दोस्रो स्थानमा उक्लिएको छ। सुदूरपश्चिमले यसअघि पोखरा एभेन्जर्स र चितवन राइनोजलाई पराजित गरेको थियो। कर्णालीको भने यो प्रतियोगितामा दोस्रो हार हो।
Discussion about this post