काठमाडौं – तिहारअघिको अन्तिम कारोबार दिन शुक्रबार सेयर बजार सामान्य अंकले बढेर बन्द भएको छ। नेप्से परिसूचक २.६४ अंकले बढेर २ हजार ६५५.२२ विन्दुमा पुगेको हो।
यस दिन ३३६ वटा कम्पनीका १ करोड ७ लाख १३ हजार ८४२ कित्ता सेयर ३ अर्ब ४६ करोड २० लाख रुपैयाँभन्दा बढीमा कारोबार भएका छन्। कारोबार रकम भने अघिल्लो दिन बिहीबारको तुलनामा घटेको छ। बिहीबार ४ अर्ब ७२ करोड रुपैयाँभन्दा बढीको कारोबार भएको थियो।
शुक्रबार कारोबारमा आएका कम्पनीमध्ये १५८ वटाको सेयर मूल्य बढेको छ भने १०७ वटाको घटेको छ। यस्तै, १४ वटा कम्पनीको सेयर मूल्य स्थिर रहेको छ।
क्रिष्ट माइक्रो लाइफ इन्स्योरेन्सको सेयर मूल्य सबैभन्दा धेरै १४.०८ प्रतिशतले बढेको छ। बेनी हाइड्रोपावर प्रोजेक्टको ५.७८ प्रतिशत र राष्ट्रिय बिमा कम्पनीको सेयर मूल्य ३.४२ प्रतिशतले वृद्धि भएको छ।
कारोबार रकमका आधारमा घोराही सिमेन्ट इन्डस्ट्रिज शीर्ष स्थानमा रहेको छ। कम्पनीको २१ करोड रुपैयाँ बराबरको सेयर कारोबार भएको छ। त्यस्तै, श्वेतगंगा हाइड्रोपावरको १२ करोड, रिलायन्स स्पिनिङ मिल्सको ११ करोड, घलेम्दी हाइड्रोको १० करोड र सानिमा माई हाइड्रोपावरको ९ करोड रुपैयाँ बराबरको कारोबार भएको छ।
यस दिन अन्य समूहको उपसूचकबाहेक अधिकांश समूहका उपसूचक सकारात्मक देखिएका छन्।
Discussion about this post