काठमाडौं — दसैँ पर्वका अवसरमा नेपाल प्रहरी र सशस्त्र प्रहरी बलले सञ्चालन गरेको निःशुल्क बस सेवाबाट काठमाडौं उपत्यकामा ३ हजार ५८५ यात्रु लाभान्वित भएका छन्।
प्रहरी प्रधान कार्यालयका अनुसार नेपाल प्रहरीका तीनवटा सवारीसाधनमार्फत कात्तिक ३ गते ५१० र कात्तिक ४ गते ८९६ गरी १ हजार ४०६ यात्रुले निःशुल्क यात्रा गरेका छन्।
त्यस्तै, सशस्त्र प्रहरी बलका दुईवटा बसबाट अष्टमी, नवमी र दशमीका दिन २ हजार १७९ यात्रुले सेवा लिएका छन्। सशस्त्र प्रहरीका सहप्रवक्ता शैलेन्द्र थापाले उक्त जानकारी दिनुभएको हो।
दसैँका बेला सार्वजनिक सवारीसाधनको अभावमा यात्रुलाई आवागमन सहज बनाउन दुवै सुरक्षा निकायले निःशुल्क बस सेवा सञ्चालन गरेका हुन्।
Discussion about this post