गोबरिया । स्वर्गीय भुवन भट्टको स्मृतिमा स्टार क्लबको आयोजनामा आगामी कार्तिक ६ देखि ९ गतेसम्म मेमोरियल फुटसल प्रतियोगिता सञ्चालन हुने भएको छ।
गोबरियास्थित पेट्रोल पम्प नजिकै रहेको द रोयल फुटसलमा आयोजना हुने प्रतियोगितामा कुल ८० हजार रुपैयाँ पुरस्कार राशि राखिएको आयोजकले जनाएको छ।
प्रतियोगितालाई खेलकुदमा मात्र सीमित नराखी सामाजिक सेवासँग जोड्ने उद्देश्यसमेत राखिएको छ। प्रतियोगिता सम्पन्न भएपछि सम्पूर्ण खर्च कटाएर बाँकी रहेको रकम अनाथालय वा वृद्धाश्रमलाई सहयोग गरिने आयोजकले जनाएको छ। साथै, प्रतियोगिताका क्रममा रक्तदान कार्यक्रमसमेत आयोजना गरिनेछ।
स्वर्गीय भुवन भट्टको स्मृतिलाई जीवन्त राख्दै युवाबीच मित्रता, एकता र खेलभावना अभिवृद्धि गर्नुका साथै सामाजिक सेवामा योगदान पुर्याउने उद्देश्यले प्रतियोगिता आयोजना गर्न लागिएको हो।
खेलकुद र सामाजिक सेवालाई एकसाथ जोड्ने यस प्रतियोगिताले स्थानीय युवालाई सामाजिक कार्यमा प्रेरित गर्नुका साथै समुदायमा सकारात्मक सन्देश प्रवाह गर्ने अपेक्षा गरिएको छ।
Discussion about this post