काठमाडौं । भोटेकोशी नदीमा आएको बाढीले बगाएको बेत्रावतीस्थित पुलको विकल्पमा नयाँ मोडुलर एक्रो ब्रिज (बेलिब्रिज) निर्माण सम्पन्न भएसँगै यातायात सेवा पुनः सञ्चालनमा आएको छ।
गत भदौ १० गते आएको भीषण बाढीले फडाकु खोलास्थित पुल बगाएपछि उक्त क्षेत्रको सडक सञ्जाल अवरुद्ध भएको थियो। लामो समयसम्म आवागमन ठप्प हुँदा स्थानीय बासिन्दा तथा यात्रुले सास्ती भोग्दै आएका थिए।
सडक विभाग र स्थानीय प्रशासनको पहलमा तीव्र गतिमा निर्माण गरिएको बेलिब्रिज आइतबार बिहान ११ बजेदेखि सञ्चालनमा ल्याइएको हो। पुल सञ्चालनमा आएसँगै उक्त खण्डमा सवारीसाधनको आवागमन सहज हुने अपेक्षा गरिएको छ।
अवरुद्ध सडक पुनः सञ्चालनमा आएपछि दैनिक उपभोग्य वस्तुको ढुवानी सहज हुनुका साथै स्थानीयको जनजीवन सामान्य बनाउन सहयोग पुग्ने विश्वास गरिएको छ। पुल सञ्चालनमा आएपछि स्थानीयवासीले राहत महसुस गरेका छन्।
Discussion about this post