आईसीसी विश्वकप क्रिकेट लिग–२ को शीर्ष चारमा पर्ने नेपालको सम्भावना समाप्त भएको छ। ओमानले क्यानडालाई पराजित गरेसँगै नेपाल शीर्ष चारमा पुग्न नसक्ने निश्चित भएको हो ।ओमानको जितसँगै नेपालले अब लिग–२ बाट सिधै विश्वकप छनोट खेल्ने अवसर गुमाएको छ। नेपालले अब विश्वकप छनोटमा पुग्न प्लेअफ खेल्नुपर्नेछ।
क्यानडालाई हराएपछि ओमानले २९ खेलबाट ३३ अंक जोडेको छ। नेपालले ३२ खेलबाट २४ अंक मात्रै प्राप्त गरेको छ। नेपालले बाँकी सबै खेल जिते पनि अधिकतम ३२ अंकसम्म पुग्ने भएकाले शीर्ष चारमा पुग्न सक्ने छैन। लिग–२ मा अमेरिका ३४ खेलबाट ४७ अंक जोड्दै च्याम्पियन बनिसकेको छ। स्कटल्यान्ड ३६ खेलबाट ४५ अंकसहित दोस्रो र नेदरल्यान्ड्स ३२ खेलबाट ३८ अंकसहित तेस्रो स्थानमा छन्।
ओमान २९ खेलबाट ३३ अंकसहित चौथो स्थानमा छ। नामिबिया ३५ खेलबाट ३१ अंकसहित पाँचौँ, क्यानडा ३३ खेलबाट २५ अंकसहित छैटौँ र नेपाल ३२ खेलबाट २४ अंकसहित सातौँ स्थानमा छ। यूएई ३१ खेलबाट १९ अंकसहित आठौँ स्थानमा रहेको छ।
नेपालले लिग–२ अन्तर्गत आफ्नो आगामी खेलमा क्यानडासँग प्रतिस्पर्धा गर्नेछ। शीर्ष चारमा पुग्ने सम्भावना समाप्त भए पनि नेपालका बाँकी खेल प्लेअफको तयारी र अंकतालिकामा आफ्नो स्थिति सुधार गर्न महत्त्वपूर्ण हुनेछन्।
Discussion about this post