बैतडी । बैतडीको शिवनाथ गाउँपालिकामा शैक्षिक गुणस्तर सुधारका चुनौती र समाधानका उपायबारे बृहत् अन्तरक्रिया तथा परामर्श सभा आयोजना हुने भएको छ।
शिवनाथ गाउँपालिका र शिक्षा नीति तथा अभ्यास केन्द्र (सामुदायिक रूपान्तरणका लागि पैरवी समूह), काठमाडौंको समन्वयमा असोज १९ गते सोमबार पालिकास्तरीय शैक्षिक गुणस्तर सुधारसम्बन्धी परामर्श सभा सञ्चालन गर्न लागिएको हो।
गाउँपालिकाका अनुसार कार्यक्रममा नेपालका शिक्षाविद् डा. विद्यानाथ कोइराला र टिका अधिकारीसँग प्रत्यक्ष अन्तरक्रिया तथा छलफल हुनेछ। छलफलमा पालिकाभित्रको शैक्षिक अवस्थाका साथै गुणस्तर सुधारका चुनौती, सम्भावना र समाधानका विकल्पबारे विचार आदानप्रदान गरिनेछ।
गाउँपालिकाका प्रमुख प्रशासकीय अधिकृत एकराज आचार्यद्वारा जारी सूचनाअनुसार कार्यक्रम असोज १९ गते बिहान १० बजेदेखि शिवनाथ गाउँपालिकाको सभाहलमा आयोजना हुनेछ।
कार्यक्रममा गाउँपालिकाका जनप्रतिनिधि, राजनीतिक दलका प्रतिनिधि, विद्यालय व्यवस्थापन समितिका अध्यक्ष, प्रधानाध्यापक, विषयगत शाखा प्रमुख, शिक्षाप्रेमी बुद्धिजीवी तथा स्थानीय पत्रकारहरूको सहभागिता रहने गाउँपालिकाले जनाएको छ।
Discussion about this post