काठमाडौं । परराष्ट्रमन्त्री शिशिर खनालले संयुक्त राष्ट्रसंघको ८१औँ महासभामा प्रधानमन्त्री बालेन्द्र साहले गरेको सम्बोधनले अन्तर्राष्ट्रिय मञ्चमा नेपालको कूटनीतिक प्रभाव र गरिमा बढाउन योगदान पुगेको बताएका छन्।
बुधबार स्वदेश फर्किएपछि त्रिभुवन अन्तर्राष्ट्रिय विमानस्थलमा आयोजित पत्रकार सम्मेलनमा मन्त्री खनालले प्रधानमन्त्रीको सम्बोधनले अन्तर्राष्ट्रिय समुदाय र सञ्चारमाध्यममा उल्लेख्य चासो पाएको बताए।
उनका अनुसार राजनीतिक परिवर्तनपछिको नयाँ परिस्थितिमा युवा प्रधानमन्त्रीले विश्व मञ्चमा नेपालको धारणा कसरी प्रस्तुत गर्छन् भन्ने विषयमा अन्तर्राष्ट्रियस्तरमै चासो थियो। प्रधानमन्त्रीको सम्बोधनपछि विभिन्न अन्तर्राष्ट्रिय व्यक्तित्वहरूले उठाइएका विषयप्रति चासो र समर्थन जनाएको उनले बताए।
महासभाका क्रममा भएका द्विपक्षीय तथा बहुपक्षीय भेटवार्तामा नेपालले जलवायु वित्त, जलवायु न्याय, हिमाली क्षेत्रमा जलवायु परिवर्तनको असर तथा विपद् जोखिमका विषयलाई प्राथमिकताका साथ उठाएको मन्त्री खनालले जानकारी दिए।
जलवायु परिवर्तनका कारण हिमाली क्षेत्रमा हिउँ पग्लने क्रम बढ्नु र प्राकृतिक विपद्का घटना बढ्दै जानु नेपालको राष्ट्रिय सुरक्षा तथा विकाससँग समेत जोडिएको विषय भएको उनले बताए।
मन्त्री खनालले महासभामा नेपालको सक्रिय सहभागिताले अन्तर्राष्ट्रिय मञ्चमा नेपालको उपस्थिति थप प्रभावकारी बनाउन सहयोग पुगेको उल्लेख गर्दै महासभालाई राष्ट्रिय हित, जलवायु परिवर्तनका असर र विकासका प्राथमिकता प्रस्तुत गर्ने महत्वपूर्ण अवसरका रूपमा उपयोग गरिएको बताए।
Discussion about this post