काठमाडौं । पृथ्वी राजमार्गअन्तर्गत कृष्णभीरमा सडक भासिएपछि काठमाडौं उपत्यकामा खाना पकाउने एलपी ग्यासको आपूर्ति सहज बनाउन उपत्यकाबाहिरै सिलिन्डर भरेर ढुवानी गर्न थालिएको छ।
ग्यास बोकेका बुलेट वैकल्पिक मार्गबाट समेत काठमाडौं प्रवेश गर्न नसकेपछि विभिन्न ग्यास उद्योगले उपत्यकाका उद्योगका सिलिन्डर बाहिरका उद्योगमा भरेर ट्रकमार्फत काठमाडौं पठाउन थालेका हुन्।
साल्ट ट्रेडिङ कर्पोरेशनको ‘एसटिसी ग्यास’ वीरगञ्जस्थित मनोज ग्यासमा भरेर काठमाडौं पठाउन थालिएको छ। यस्तै, चितवनको बाबा ग्यासले एक हजार ५०० वटा श्री ग्यासका सिलिन्डर भरेर पठाएको छ। श्री ग्यासको प्लान्ट धादिङको नौबिसेमा रहेको छ।
त्यसैगरी, चितवनको साइबाबा ग्यासले आफ्ना ९०० सिलिन्डर काठमाडौं पठाएको छ भने नेपाल ग्यास गण्डकीले बालाजुको नेपाल ग्यासका एक हजार २०० सिलिन्डर भरेर पठाएको जनाइएको छ।
गैँडाकोटको जानकी ग्यासमा नौबिसेको श्रीराम ग्यास, हेटौँडाको साहारा ग्यासमा काठमाडौंका एभरेस्ट र सुगम ग्यासका सिलिन्डर भरेर पठाउने व्यवस्था मिलाइएको छ।
बनेपाको सगरमाथा ग्यासले परासीको चण्डी ग्यास तथा लोकप्रिय, सुपर र तारा ग्यासलगायत उद्योगले पनि काठमाडौं बाहिरका विभिन्न उद्योगसँग समन्वय गरी सिलिन्डर भरेर त्रिभुवन राजपथ हुँदै काठमाडौं पठाउन थालेका छन्।
नेपाल एलपी ग्यास उद्योग संघका सदस्य तथा बाबा ग्यासका सञ्चालक विमल कालाखेतीका अनुसार भारतबाट नेपाल भित्रिने ग्यासको आपूर्तिमा कमी आएको छैन। बुलेट काठमाडौंसम्म पुर्याउन नसकेका उद्योगले बाहिरका उद्योगसँग समन्वय गरी सिलिन्डर भरेर पठाइरहेकाले तत्काल ग्यास अभाव नहुने उहाँको भनाइ छ।
उहाँका अनुसार गएको महिना भारतबाट ६० हजार २०० मेट्रिकटन एलपी ग्यास नेपाल भित्रिएको थियो, जुन हालसम्मकै उच्च परिमाणमध्ये एक हो। उपत्यका र आसपासका १६ वटा ग्यास उद्योगले बारा, पर्सा, चितवन, मकवानपुर तथा नवलपरासीका उद्योगसँग समन्वय गरेर सिलिन्डर भरी उपत्यकामा आपूर्ति गरिरहेका छन्।
Discussion about this post