महेन्द्रनगर । कञ्चनपुरको बेदकोट नगरपालिका–५ ले रसुवाको भोटेकोशी क्षेत्रमा आएको विनाशकारी बाढीबाट प्रभावित परिवारको राहत तथा पुनःस्थापनाका लागि २ लाख ३० हजार रुपैयाँ सहयोग गरेको छ।
वडा अध्यक्ष चित्रदेव भट्टको पहलमा वडाभित्र रहेका विभिन्न संघसंस्था, सहकारी तथा सहयोगी व्यक्तिहरूसँग समन्वय गरी उक्त रकम संकलन गरिएको हो।
संकलित रकम नेपाल सरकारको प्रधानमन्त्री दैवी प्रकोप उद्धार कोष (प्रधानमन्त्री राहत कोष) मा जम्मा गरिएको वडा अध्यक्ष भट्टले जानकारी दिनुभयो। प्राकृतिक विपद्बाट प्रभावित नागरिकको राहत तथा पुनःस्थापनामा सहयोग पुगोस् भन्ने उद्देश्यले रकम संकलन गरी सरकारी राहत कोषमा जम्मा गरिएको उहाँले बताउनुभयो।
वडा अध्यक्ष भट्टले विपद्का समयमा मानवीय सहयोग र सामाजिक उत्तरदायित्व निर्वाह गर्दै सहयोग गर्ने वडाभित्रका संघसंस्था, सहकारी तथा सम्पूर्ण सहयोगीप्रति धन्यवाद व्यक्त गर्नुभएको छ।
उहाँले आगामी दिनमा पनि विपद् प्रभावित नागरिकको सहयोगका लागि आवश्यक पहल र सहकार्यलाई निरन्तरता दिने बताउनुभयो।
Discussion about this post