रुकुमपूर्व प्रशासनका सेवा प्रविधिमैत्री बन्दै

रुकुमपूर्व : जिल्ला प्रशासन कार्यालय रुकुमपूर्वबाट प्रवाह हुने सेवाहरूलाई छिटो, छरितो र प्रविधिमैत्री बनाउन विभिन्न निवेदनका ढाँचा क्यूआर कोडमार्फत उपलब्ध गराइएको छ। सेवाग्राही नागरिकले आफूले लिन चाहेको सेवासँग सम्बन्धित निवेदनको ढाँचा क्यूआर कोड स्क्यान गरी मोबाइलबाटै डाउनलोड गर्न सक्ने व्यवस्था गरिएको जिल्ला प्रशासन कार्यालय रुकुमपूर्वले जनाएको छ।

निवेदनको ढाँचा लिन कार्यालयमै पुग्नुपर्ने बाध्यता हटाउँदै सेवाग्राहीलाई घरबाटै आवश्यक ढाँचा डाउनलोड गरी तयार गर्न सक्ने व्यवस्था गरिएको हो। यसबाट सेवाग्राहीको समय र श्रम बचत हुनुका साथै कार्यालयको सेवाप्रवाह थप सहज हुने अपेक्षा गरिएको छ।

प्रमुख जिल्ला अधिकारी कोपिला राईले सेवाग्राहीलाई सहज र छिटो सेवा उपलब्ध गराउने उद्देश्यले निवेदनका ढाँचालाई क्यूआर कोडमार्फत उपलब्ध गराइएको बताइन्। ‘जिल्ला प्रशासन कार्यालयबाट प्रवाह हुने सेवाहरूलाई छिटो, छरितो र प्रविधिमैत्री बनाउने उद्देश्यले निवेदनका ढाँचालाई क्यूआर कोडमा राखेका छौँ। सेवाग्राहीले क्यूआर स्क्यान गरेर आफूले लिन चाहेको सेवासँग सम्बन्धित निवेदनको ढाँचा डाउनलोड गरी प्रयोग गर्न सक्नुहुन्छ,’ राईले भनिन्।

उनका अनुसार प्रविधिको प्रयोगमार्फत सेवाग्राहीलाई सहज बनाउनुका साथै कार्यालयमा हुने अनावश्यक भीडसमेत कम गर्ने उद्देश्य राखिएको छ। ‘प्रविधिको प्रयोग गर्न असहज हुने सेवाग्राहीलाई पनि समस्या नहोस् भनेर कार्यालयको नागरिक सहायता कक्ष अर्थात् हेल्प डेस्कबाट आवश्यक निवेदनका ढाँचा उपलब्ध गराउने व्यवस्था गरिएको छ,’राईले भनिन्

सेवाप्रवाहलाई थप सहज, पारदर्शी र प्रविधिमैत्री बनाउने उद्देश्यअनुसार कार्यालयले आगामी दिनमा पनि आवश्यक सुधार तथा प्रविधिको प्रयोगलाई प्राथमिकता दिने जनाएको छ ।।