बैतडी । बैतडीमा शारीरिक अशक्तता तथा अपाङ्गता भएका नागरिकलाई घरमै पुगेर नागरिकता प्रदान गरिने भएको छ। जिल्ला प्रशासन कार्यालय बैतडीले सञ्चालन गर्न लागेको ‘अशक्तको घरमा प्रजिअ’ कार्यक्रमअन्तर्गत उमेर पुगे पनि शारीरिक अशक्तता वा अपाङ्गताका कारण नागरिकता लिनबाट वञ्चित नागरिकलाई घरमै पुगेर सेवा प्रदान गर्न लागिएको हो।
प्रमुख जिल्ला अधिकारी मीना अर्यालका अनुसार यसका लागि जिल्लाका १० वटै स्थानीय तहलाई शारीरिक अशक्तता तथा अपाङ्गता भएका नागरिकको विवरण सङ्कलन गरी पठाउन भनिएको छ।
“सबै स्थानीय तहबाट अशक्त तथा अपाङ्गता भएका नागरिकको विवरण माग गरेका छौँ,” प्रजिअ अर्यालले भनिन्, “विवरण प्राप्त भएपछि सम्बन्धित नागरिकको घर वा पायक पर्ने स्थानमा पुगेर आवश्यक प्रक्रिया पूरा गरी नागरिकता प्रदान गर्छौं।”
प्रशासन कार्यालयसम्म पुग्न कठिनाइ हुने नागरिकलाई लक्षित गरी कार्यक्रम सञ्चालन गर्न लागिएको जिल्ला प्रशासन कार्यालयले जनाएको छ। विशेषगरी हिँडडुल गर्न कठिनाइ भएका, शारीरिक रूपमा अशक्त तथा प्रशासन कार्यालयसम्म पुग्न असहज हुने नागरिक यसबाट प्रत्यक्ष लाभान्वित हुने अपेक्षा गरिएको छ।
नागरिकता प्राप्त गर्नकै लागि प्रशासन कार्यालयसम्म पुग्नुपर्ने बाध्यता हट्ने भएकाले कार्यक्रमले अशक्त तथा अपाङ्गता भएका नागरिकलाई राज्यबाट प्राप्त हुने सेवा सुविधा सहज रूपमा उपलब्ध गराउन सहयोग पुग्ने प्रजिअ अर्यालले बताइन्।
स्थानीय तहबाट विवरण प्राप्त भएपछि प्रशासन कार्यालयले सम्बन्धित पालिकासँग समन्वय र सहकार्य गरी घरमै पुगेर नागरिकता वितरणको प्रक्रिया अघि बढाउने जनाएको छ।
Discussion about this post