कञ्चनपुर । कञ्चनपुरको कृष्णपुर नगरपालिका वडा नम्बर-२ को खल्लागोठमा बगर संरक्षण गर्न वृक्षारोपण गरिएको छ। जनहीत महाकाली सामुदायिक वन उपभोक्ता समिति, खल्लागोठको आयोजनामा तथा नेपाल राष्ट्रिय समाज कल्याण संघ (एनएनएसडब्लुए) र मर्सीकोर नेपालको साझेदारीमा सञ्चालित ‘जलवायु उत्थानशिल समुदाय (सिआरसी)’ परियोजना अन्तर्गत डिभिजन वन कार्यालय कञ्चनपुर र कृष्णपुर नगरपालिकासँगको सहकार्यमा खल्लागोठमा वृक्षरोपण कार्यक्रम सम्पन्न गरिएको हो।
प्रत्येक वर्ष मनसुनको समयमा मछेली नदीले कटान गरिरहेको उक्त क्षेत्रमा बगर संरक्षण गर्न र कटान रोक्नका लागि ५७०० बिरुवा लगाइएको छ। यसअघि मात्रै सिआरसी परियोजना अन्तर्गत कृष्णपुर नगरपालिका तथा वडा कार्यालयको सहकार्यमा उक्त क्षेत्रमा १७० मिटर जैविक तटबन्ध निर्माण गरिएको थियो। त्यस्तै बगर संरक्षण कार्यक्रम अन्तर्गत उक्त क्षेत्रमा १२५० मिटर तारबार गरिएको थियो, जसमा डिभिजन वन कार्यालयले ९०० मिटर तारबार गरेको थियो भने सिआरसी परियोजनाबाट ३५० मिटर तारबार गरिएको थियो।
वृक्षरोपण कार्यक्रममा बिरुवा रोप्दै सुदूरपश्चिम प्रदेशका वन निर्देशक हेमराज विष्टले जलवायु परिवर्तनको असर र नदी कटानको जोखिम न्यूनीकरणका लागि वनस्पति र जैविक इन्जिनियरिङ सबैभन्दा प्रभावकारी माध्यम भएको बताउनुभयो। उहाँले रोपिएका बिरुवाहरूको संरक्षणमा स्थानीय समुदाय र सामुदायिक वन उपभोक्ता समिति आफैँ जिम्मेवार भएर लाग्नुपर्नेमा जोड दिनुभयो।
त्यस्तै, कृष्णपुर नगरपालिकाका नगर प्रमुख हेमराज ओझाले मछेली नदीको तटीय क्षेत्रमा बसोबास गर्ने नागरिकको सुरक्षा र पर्यावरण जोगाउन नगरपालिकाले स्थानीय र दातृ निकायहरूसँग निरन्तर सहकार्य गरिरहेको बताउनुभयो। जैविक तटबन्ध, तारबार र वृक्षरोपणको यो एकीकृत नमुनाले खल्लागोठ क्षेत्रलाई बाढीको जोखिमबाट जोगाउन महत्वपूर्ण भूमिका खेल्ने विश्वास उहाँले व्यक्त गर्नुभयो।
कञ्चनपुरका डिएफओ लक्ष्मीराज जोशीले डिभिजन वन कार्यालयले बगर संरक्षण र वृक्षरोपणका लागि आवश्यक प्राविधिक एवम् भौतिक सहयोगलाई प्राथमिकतामा राखेको बताउनुभयो। उहाँले वन कार्यालय र परियोजनाको संयुक्त लगानीमा भएको तारबारले रोपिएका बिरुवाहरूलाई चौपाया र बाह्य क्षतिबाट जोगाउन मद्दत पुग्ने बताउनुभयो।
कृष्णपुर नगरपालिका वडा नम्बर -२ का वडा अध्यक्ष अर्जुन सिंह साउदले खल्लागोठ बगर र तटीय क्षेत्रको संरक्षणका लागि स्थानीय सरकार गम्भीरताका साथ लागिपरेको बताउनुभयो। उहाँले जैविक तटबन्ध, तारबार र वृक्षरोपण कार्यले यस क्षेत्रका नागरिकलाई ठूलो राहत मिल्ने बताउनुभयो।
सिआरसी परियोजनाका मिल अफिसर गोविन्द नारायण उपाध्यायले समुदायलाई जलवायुजन्य विपद् सङ्कटबाट उत्थानशील बनाउन यो बहुसरोकारवाला सहकार्य गरिएको बताउनुभयो। उहाँले स्थानीय सरकार र वन कार्यालयको अपनत्वसहित गरिएको यो कामले खल्लागोठका बासिन्दाको सुरक्षित भविष्य र दिगो बगर व्यवस्थापनमा टेवा पुग्ने धारणा व्यक्त गर्नुभयो।
कार्यक्रममा सब-डिभिजन वन कार्यालयका प्रतिनिधिहरू, सामुदायिक विपद् व्यवस्थापन समितिका प्रतिनिधि, स्थानीय तथा उपभोक्ताहरूको उल्लेख्य सहभागिता रहेको थियो।
Discussion about this post