कञ्चनपुर । कञ्चनपुरको वेदकोट नगरपालिका वडा नम्बर ९ सुन्दरपुरका जय सिंह धामी भैंसी पालन गरी मनग्य आम्दानी गर्दै आइरहेका छन्। २०७२ सालदेखि निरन्तर यस कार्यमा लागेका उनी कञ्चनपुरकै सफल र उदाहरणीय कृषक हुन्।
व्यवसायिक भैंसी पालन गर्दै आइरहेका उनी दैनिक आफ्नो फार्मकै काममा व्यस्त भेटिन्छन्। विगतमा बंगुर पालन पनि गरेका उनले स्वाइन फ्लु भएर एकै रातमा २५ वटा बंगुर मरेपछि झण्डै ४ लाख घाटा खाएका थिए। तर त्यसपछि उनले हिम्मत हारेनन् र भैंसी पालन तिर लागे। अहिले उनी उक्त पेसाबाट सन्तुष्टिको जीवन बिताइरहेका छन्।
अहिले उनीसँग ९ वटा भैंसी र ३ वटा पाडा रहेका छन्। त्यस्तै एउटा गाई र एउटा बाच्छि समेत पालेका छन्। उनी फार्मबाट दैनिक ३० देखि ३५ लिटर दूध बेच्ने गर्छन्, जसबाट दैनिक ८ देखि १० हजार रुपैयाँ बराबरको दूध बिक्री हुने गरेको छ। यो कमाइको आधा रकम गाईभैँसीको दाना र चोकरका लागि छुट्याउँदा पनि आधा रकम मुनाफा हुने गरेको उनी बताउँछन्।
युवाहरू विदेशिने क्रम दिनानुदिन बढिरहेको बेला आफ्नो गाउँ ठाउँमा उनले नमूना रूपमा भैंसी पालन गरी उदाहरणीय कार्य गरेका छन्। परम्परागत कृषि भन्दा पनि व्यवसायिक रूपमा कृषि गर्नुपर्छ र स्वाभिमानका साथ जीवन जिउनुपर्छ भन्ने उनको मान्यता रहेको छ। उनी भन्छन्, ‘विदेशमा गएर अरुको काम गर्नुभन्दा आफ्नो गाउँठाउँमा केही गरेर सन्तुष्टिको जीवन जिउनुपर्छ।’
उनको एक छोरी, एक छोरा र श्रीमती गरी ४ जनाको परिवार छ। तर उनीमाथि थप पारिवारिक जिम्मेवारी पनि रहेको छ। आफ्ना दाई-भाउजु निधन भएका कारण दाईका ४ जना छोराछोरीलाई पनि उनले नै पालनपोषण र शिक्षादीक्षा दिई हुर्काइ रहेका छन्।
भेटेरिनरी अस्पताल तथा पशु सेवा विज्ञ केन्द्र कञ्चनपुरबाट अहिले उनलाई उद्यम विस्तारका लागि अनुदान समेत प्राप्त भएको छ। जस अन्तर्गत उनले आफ्नो व्यावसायिक भैंसी पालनलाई थप सुदृढ र आधुनिक बनाउन व्यवस्थित गोठ निर्माण गरेका छन् त्यस्तै च्यापकटर लगायतका अन्य सामग्री समेत प्रदान गरिएको छ।
उक्त गोठ निर्माणमा आधा लगानी भेटेरिनरी अस्पताल तथा पशु सेवा विज्ञ केन्द्र कञ्चनपुरको र आधा लगानी उनको आफ्नै रहेको छ।दैनिक रूपमा आफ्नै माटोमा पसिना बगाइरहेका जय सिंहको यो व्यावसायिक यात्राले विदेश जान चाहने र गाउँमै केही गर्न खोज्ने अन्य युवाहरूलाई पनि ठूलो प्रेरणा दिएको छ।
Discussion about this post