कैलाली । कैलालीको चुरे गाउँपालिकामा रहेका सामुदायिक विपद् व्यवस्थापन समितिहरूलाई दक्ष बनाउने उद्देश्यले आयोजना गरिएको ५ दिने ‘सामुदायिक प्रतिकार्य टोली तालिम’ सफलतापूर्वक सम्पन्न भएको छ। विपद्का समयमा समुदाय स्तरमै तत्काल प्रतिकार्य गर्न सक्ने जनशक्ति तयार पार्न यो तालिम सञ्चालन गरिएको हो।
मर्सीकोर नेपाल, नेपाल राष्ट्रिय समाज कल्याण सङ्घ (एनएनएसडब्लुए) र द कोकाकोला फाउन्डेसनद्वारा सञ्चालित ‘नेपालमा पूर्वानुमानमा आधारित पूर्वकार्यको सुदृढीकरण’ (सान) परियोजना अन्तर्गत उक्त तालिम सञ्चालन गरिएको हो। तालिममा चुरे गाउँपालिका वडा नम्बर ३ र ६ अन्तर्गतका कालिका, पिपल चौतारा, शान्तिनगर र लेकबेसी सामुदायिक विपद् व्यवस्थापन समितिका ६–६ जना गरी कुल २४ जना प्रशिक्षार्थीहरूको सहभागिता रहेको थियो।
सान परियोजनाका संयोजक देवराज बडुले ५ दिनसम्म सहभागीहरूलाई सञ्चार र समुदाय परिचालन, सामुदायिक नक्सांकन, आधारभूत खोज तथा उद्धार, अवस्थाको विश्लेषण, खोज विधि, संरचना र संकेत चिन्हहरूका बारेमा प्रयोगात्मक अभ्यास गराइएको बताउनुभयो। उहाँका अनुसार आगलागी, आपतकालीन अवस्था व्यवस्थापन, पानीजन्य विपद् र घाइतेको सुरक्षित उद्धार तथा स्थानान्तरण सम्बन्धी सीपमा सहभागीहरूलाई दक्ष बनाइएको छ।
यसैगरी, तालिममा महामारी परिचय, प्राथमिक उपचार, मनोसामाजिक सहयोग, मुटु तथा फोक्सो पुनर्जीवन प्रक्रिया (CPR), रक्तस्राव र चोटपटक व्यवस्थापन, तनाव व्यवस्थापन, जलन (Burn) व्यवस्थापन तथा विषाक्तता र जनावरको टोकाइ सम्बन्धी प्राथमिक उपचारका बारेमा समेत विस्तृत व्यवहारिक ज्ञान प्रदान गरिएको छ।
नेपाल रेडक्रस सोसाईटीका प्रशिक्षकद्वय सुशील चौधरी र खेमराज विश्वकर्माले तालिमको सहजीकरण गर्नुभएको थियो।तालिमको समापनमा सहभागीहरूलाई प्रमाणपत्र प्रदान गर्दै सिकेका सीपहरूलाई आफ्नो समुदायमा आइपर्ने विपद्का समयमा प्रभावकारी रूपमा प्रयोग गर्न आग्रह गरिएको छ।
यस तालिमले चुरे जस्तो भौगोलिक रूपमा जोखिमपूर्ण क्षेत्रमा स्थानीय स्तरमै दक्ष जनशक्ति तयार गरी विपद्बाट हुन सक्ने सम्भावित धनजनको क्षति न्यूनीकरण गर्न महत्वपूर्ण भूमिका खेल्ने विश्वास गरिएको छ।
Discussion about this post