कञ्चनपुर । कञ्चनपुरको भीमदत्त नगरपालिका वडा नम्बर -११ मा महिलाहरूलाई स्वरोजगार बनाउने उद्देश्यका साथ तीन महिने ब्युटिसियन तालिम सुरु भएको छ। वडा कार्यालयको आयोजना तथा व्यावसायिक तथा सीप विकास तालिम केन्द्र कञ्चनपुरको प्राविधिक सहकार्यमा उक्त तालिम सञ्चालन हुन लागेको हो।
तालिममा वडा भित्रका २४ जना महिलाहरूको सहभागिता रहेको छ। महिलाहरूलाई ब्युटिसियन क्षेत्रमा दक्ष बनाएर उनीहरूलाई आर्थिक रूपमा आत्मनिर्भर बनाउन र स्थानीयस्तरमै रोजगारीका अवसरहरू सिर्जना गर्न तालिम प्रभावकारी हुने विश्वास लिइएको छ।
वडा अध्यक्ष प्रकाश थापाले वडाका बासिन्दाहरूलाई दक्ष र सीपयुक्त बनाउन वडा कार्यालयले विभिन्न किसिमका सीपमूलक तालिमहरू आयोजना गर्दै आइरहेको बताउनुभयो। अध्यक्ष थापाका अनुसार यो तालिमले महिलाहरूलाई केवल सीप मात्र सिकाउने नभई उनीहरूलाई आफ्नै व्यवसाय सुरु गर्न सक्ने आत्मविश्वास समेत प्रदान गर्नेछ।
वडा कार्यालयले आगामी दिनमा पनि समुदायको माग र आवश्यकताका आधारमा उत्पादनमुखी र सीपमूलक कार्यक्रमहरूलाई निरन्तरता दिने योजना बनाएको छ। तालिम अवधिभर सहभागीहरूलाई ब्युटिसियन सम्बन्धी आधारभूतदेखि व्यावसायिक तहसम्मका विभिन्न सीपहरू सिकाइनेछ।
Discussion about this post