कञ्चनपुर । कौशी थिएटर अर्थात् ‘कथा घेरा’ टिम यतिबेला घुम्ती सडक नाटक ‘बाटैबाटो’ लिएर सुदूरपश्चिम र कर्णाली प्रदेशको यात्रामा निस्किएको छ। सोही अभियानअन्तर्गत शुक्रबार कञ्चनपुरको महेन्द्रनगरस्थित महेन्द्र स्मारक चोकमा नाटक मञ्चन गरिएको छ।
१० दिन १० स्थानमा नाटक मञ्चन गर्ने लक्ष्यसहित निस्किएको टोलीले हिजो कैलालीको धनगढीमा पहिलो प्रस्तुति दिएको थियो। टोली अब १५ गते डोटीको जोरायल, १७ गते डडेल्धुराको अमरगढी र २० गते अछामको मंगलसेन पुग्ने कार्यक्रम रहेको छ।
नाटकले महिला सशक्तीकरण र श्रममा समान अवसरको सन्देश बोकेको कथा घेरा थिएटरकी निर्देशक आकाङ्क्षा कार्कीले बताउनुभयो। महिलालाई घरभित्र सीमित राख्ने परम्परागत सोच अझै पनि विद्यमान रहेको चर्चा गर्दै नाटकले यस्ता सामाजिक धारणा र पूर्वाग्रहलाई चुनौती दिने उहाँले बताउनुभयो। महिलाले घर र पेसागत जीवन दुवैलाई सन्तुलित रूपमा अगाडि बढाउन सक्छन् भन्ने सन्देश प्रवाह गर्न नाटक सफल हुने उहाँले बताउनुभयो। त्यस्तै, परिवार, समुदाय र समाजका सदस्यहरूले महिलालाई आर्थिक गतिविधिमा सहभागी हुन प्रोत्साहन र समर्थन गर्नुपर्ने आवश्यकतालाई नाटकले उजागर गर्ने उहाँले बताउनुभयो।
झन्डै एक महिनाको तयारीपछि मञ्चन गरिएको यो नाटक ‘GRAPE 2 (Green Resilient Agricultural-Centred Private Sector Economic Development)’ परियोजना अन्तर्गत आयोजना गरिएको हो।
सुदूरपश्चिमको यात्रापछि टोली कर्णाली प्रदेशका जिल्लाहरूमा केन्द्रित हुनेछ। तालिका अनुसार २२ गते दैलेखको दुल्लु, २४ गते नारायण, २६ गते सुर्खेतको वीरेन्द्रनगर, २८ गते भेरीगङ्गा र ३० गते सल्यानको सल्लीबजारमा नाटक देखाइनेछ।
नाटकमा वेनिशा आचार्य, नेबिका सिलधर, सेविता अधिकारी, सुस्मिता कुँवर, जीवन ढकाल, विजय नेपाल, प्रसुनकुमार खत्री र रोबित मुनि तुलाधर गरी ८ जना कलाकार र संगीतकर्मीहरूको सहभागिता छ। भ्रमण टोलीमा निर्देशक सुदाम छात्कुली र लुनिभा तुलाधर समेत सहभागी छन्।
Discussion about this post