कञ्चनपुरमा लागूऔषध प्रयोगकर्ताका लागि फौजदारी मुद्दा र दण्डका विकल्पबारे अभिमुखीकरण सम्पन्न

कञ्चनपुर । रिकभरिङ्ग नेपाल महासंघले कञ्चनपुरमा ‘नेपालमा लागूऔषध प्रयोगकर्ताहरूलाई फौजदारी मुद्दा/दण्डका विकल्पहरू’ सम्बन्धी एकदिने अभिमुखीकरण कार्यक्रम सम्पन्न गरेको छ।

रिकभरिङ्ग नेपालले एच.आई.भी. र हेपाटाइटिस सी बाट संक्रमित व्यक्तिहरू, लागूऔषध प्रयोगकर्ताहरू र समाजमा सीमान्तकृत अवस्थामा रहेका पीडितहरूको हकहितका लागि निरन्तर आवाज उठाउँदै आएको छ। संस्थाले उनीहरूमाथि हुने विभेद अन्त्य गर्दै आधारभूत मानव अधिकारको सुनिश्चितता र प्रभावकारी उपचारमा पहुँच पुर्‍याउन देशभर वकालत र क्षमता अभिवृद्धिका कार्यक्रमहरू सञ्चालन गर्दै आइरहेको छ। सोही अभियान अन्तर्गत कञ्चनपुरमा यो कार्यक्रम आयोजना गरिएको हो।

जिल्ला प्रशासन कार्यालय कञ्चनपुरका सहायक जिल्ला अधिकारी मोहनचन्द्र जोशीको अध्यक्षतामा सम्पन्न उक्त कार्यक्रममा रिकभरिङ्ग नेपालका प्रतिनिधि नवराज पाण्डेले कार्यक्रमको अवधारणा र उद्देश्यमाथि प्रकाश पार्नुभएको थियो। कार्यक्रममा लागूऔषध प्रयोगकर्ताहरूलाई कानुनी दण्ड मात्र नदिएर सुधारका अन्य विकल्पहरूका बारेमा छलफल गरिएको थियो।

कार्यक्रममा सरकारी वकिल कार्यालयका सह-न्यायाधिवक्ता कपिल कोइराला, जिल्ला बार एसोसिएसन कञ्चनपुरका अध्यक्ष अधिवक्ता नरेन्द्र सिंह र पूर्व अध्यक्ष अधिवक्ता कृष्णदेव जोशीको उपस्थिति रहेको थियो। त्यसैगरी, महाकाली प्रादेशिक अस्पतालका डा. योगेश भट्ट र जिल्ला प्रहरी कार्यालय कञ्चनपुरका प्रतिनिधि लगायत विभिन्न सरोकारवाला संघसंस्थाहरूको सक्रिय सहभागिता रहेको थियो।

अभिमुखीकरणका क्रममा सहभागीहरूले विद्यमान कानुन, नीति-नियम र यसका व्यवहारिक चुनौतीहरूको बारेमा गहन छलफल गरेका थिए। सहभागी सरोकारवालाहरूले लागूऔषधको समस्या समाधानका लागि कानुनी उपचारसँगै मानवीय र सुधारात्मक पक्षलाई जोड दिनुपर्ने भन्दै आ-आफ्नो राय, सल्लाह र सुझावहरू समेत प्रस्तुत गरेका थिए।