कञ्चनपुर । कञ्चनपुर कञ्चनपुरका तीन वटै निर्वाचन क्षेत्रका प्रतिनिधि सभा सदस्यका उम्मेदवारहरूबीच एक विशेष प्रत्यक्ष संवाद (ककस) कार्यक्रम सम्पन्न भएको छ।
महेन्द्रनगर जेसिजको आयोजना तथा नेपाल राष्ट्रिय समाज कल्याण संघ (एनएनएसडब्लुए) को सह-आयोजनामा उक्त कार्यक्रम आयोजना गरिएको हो।
निर्वाचनको पूर्वसन्ध्यामा आयोजित उक्त संवादमा उम्मेदवारहरूले आफ्ना चुनावी एजेण्डा, भावी योजना र क्षेत्रको विकासका लागि आफ्नो भिजन प्रस्तुत गरेका थिए।
कार्यक्रममा सहभागी नागरिकहरूले राखेका जिज्ञासा र प्रश्नहरूको उम्मेदवारहरूले प्रत्यक्ष उत्तर दिँदै आफूलाई मत दिनुपर्ने आधारहरू स्पष्ट पारेका थिए।
कार्यक्रमलाई न्यूज २४ नेपालका चर्चित पत्रकार बीरेन्द्र जैरूले सहजीकरण गर्नुभएको थियो। उहाँको सन्तुलित र तार्किक प्रश्नोत्तर शैलीले कार्यक्रमलाई थप रोचक र प्रभावकारी बनाएको सहभागीहरूले बताएका छन्।
महेन्द्रनगर जेसिजका अध्यक्ष लक्ष्मण पन्तले कार्यक्रमको उद्देश्यमाथि प्रकाश पार्दै मतदाता र उम्मेदवारबीचको दूरी कम गर्न र योग्य प्रतिनिधि छनोटमा सहयोग पुर्याउन यस्तो मञ्चको आयोजना गरिएको बताउनुभयो। उहाँले लोकतन्त्रको सुदृढीकरणका लागि उम्मेदवारहरूको प्रतिबद्धता र जनताको खबरदारी आवश्यक रहेकोमा जोड दिनुभयो।
त्यसैगरी, नेपाल राष्ट्रिय समाज कल्याण संघ (एनएनएसडब्लुए) का कार्यकारी निर्देशक अशोक विक्रम जैरूले विकास र सामाजिक न्यायका मुद्दाहरूमा उम्मेदवारहरूको धारणा बुझ्न यो संवाद महत्त्वपूर्ण रहेको बताउनुभयो। उहाँले निर्वाचित भएर जाने प्रतिनिधिले जनताका आधारभूत आवश्यकतालाई प्राथमिकतामा राख्नुपर्ने सुझाव समेत दिनुभयो।
कार्यक्रमको सञ्चालन महेन्द्रनगर जेसिजका पूर्व अध्यक्ष कबि अवस्थीले गर्नुभएको थियो। कार्यक्रममा विभिन्न राजनीतिक दलका प्रतिनिधि, स्वतन्त्र उम्मेदवार, नागरिक समाजका अगुवा र स्थानीय मतदाताहरूको बाक्लो उपस्थिति रहेको थियो।
Discussion about this post