काठमाडौँ । रसुवास्थित भोटेकोशी नदीमा भदौ १० गते आएको विनाशकारी बाढीले रसुवा, नुवाकोट, धादिङ र गोरखाका ५५ वटा खानेपानी आयोजनामा क्षति पुर्याएको छ।
खानेपानी तथा ढल व्यवस्थापन विभागका अनुसार बाढीबाट क्षतिग्रस्त आयोजनाको प्रारम्भिक विवरण संकलन गर्दा करिब रु ६४ करोड बराबरको क्षति भएको अनुमान गरिएको छ। क्षतिको विस्तृत विवरण भने अझै संकलन भइरहेको विभागले जनाएको छ।
बाढीबाट सबैभन्दा बढी प्रभावित नुवाकोटमा २२ वटा खानेपानी आयोजनामा क्षति पुगेको छ। ती आयोजनामा मात्रै करिब रु ४ करोड ११ लाख ५० हजार बराबरको क्षति भएको विभागले जनाएको छ।
विभागका महानिर्देशक कमलराज श्रेष्ठका अनुसार धादिङका २०, गोरखाका पाँच र रसुवाका आठवटा खानेपानी आयोजना पनि बाढीबाट प्रभावित भएका छन्।
बाढीका कारण खानेपानी सेवा अवरुद्ध भएका क्षेत्रमा तत्काल सेवा सञ्चालन गर्न विभागले वैकल्पिक स्रोतको प्रयोग, मर्मत तथा पुनःस्थापनालाई प्राथमिकता दिएको छ।
विशेषगरी विदुर खानेपानी आयोजना प्रभावित क्षेत्रमा पानी वितरण सहज बनाउन १०० केभीए क्षमताको डिजेल जेनेरेटर सञ्चालनमा ल्याइएको छ। उक्त जेनेरेटरमार्फत दैनिक करिब पाँच लाख लिटर पानी वितरण गर्ने व्यवस्था मिलाइएको विभागले जनाएको छ।
त्यस्तै, एक एचपी क्षमताका सातवटा पम्प सञ्चालनमा ल्याएर बट्टार क्षेत्रका करिब ५०० घरपरिवारमा खानेपानी सेवा पुनः सञ्चालन गरिएको छ।
काठमाडौँ उपत्यका खानेपानी लिमिटेड (केयुकेएल)सँगको समन्वयमा भदौ १२ गतेदेखि चारवटा ट्याङ्करमार्फत विदुर र बट्टारका विभिन्न बस्तीमा खानेपानी वितरण भइरहेको महानिर्देशक श्रेष्ठले बताए।
बाढी प्रभावित त्रिशूली बजार, बेलकोटगढी, कोल्पुटार, गल्छी, गजुरी र विदुरका अन्य क्षेत्रमा समेत खानेपानी सेवा विस्तारका लागि आवश्यक सामग्री व्यवस्थापन गरिएको विभागले जनाएको छ।
सेवा विस्तारका लागि दुई एचपी र एक एचपी क्षमताका गरी १४ वटा पम्प, एक हजार लिटर क्षमताको हिलटेक ट्याङ्की तथा करिब ४१.१ किलोमिटर एचडीपीई पाइप तयारी अवस्थामा राखिएको छ। ती सामग्री प्रभावित क्षेत्रमा ढुवानी तथा जडान गरी खानेपानी सेवा विस्तार गर्ने तयारी भइरहेको विभागले जनाएको छ।
बाढीबाट क्षतिग्रस्त संरचनाको मर्मत, पुनःस्थापना तथा प्रभावित बस्तीमा नियमित खानेपानी आपूर्ति सुनिश्चित गर्न प्राविधिक टोली परिचालन गरिएको छ।
विभागका अनुसार तत्काल खानेपानी अभाव हुन नदिन राहत तथा वैकल्पिक वितरणसँगै क्षतिग्रस्त संरचनाको दीर्घकालीन पुनःनिर्माणको कामसमेत अघि बढाइनेछ।
क्षतिको पूर्ण विवरण प्राप्त भएपछि आवश्यकताका आधारमा थप पुनःस्थापना तथा पुनर्निर्माणका कार्यक्रम सञ्चालन गरिने विभागले जनाएको छ।
Discussion about this post