काठमाडौं । रसुवाको भोटेकोशी नदीमा आएको बाढीपछि प्रभावित रसुवागढी जलविद्युत् आयोजनाको सुरुङभित्र गरिएको खोजीमा कुनै पनि व्यक्ति फेला नपरेपछि नेपाली सेनाको उद्धार टोली फर्किएको छ।
सुरुङको अन्तिम भागमा मानिसहरू फसेको आशंका भएपछि नेपाली सेनाको नेतृत्वमा इन्जिनियर तथा ड्रोन टोलीसहित खोजी अभियान सञ्चालन गरिएको थियो।
उद्धार टोलीले सुरुङको भित्री भाग हुँदै अन्तिम बिन्दुसम्म पुगेर विस्तृत खोजी गरेको थियो। सुरुङभित्र ड्रोनसमेत उडाएर निरीक्षण गर्दा पनि कुनै मानवीय उपस्थिति फेला नपरेको सेनाले जनाएको छ।
सुरुङभित्र कोही पनि व्यक्ति नरहेको निष्कर्षमा पुगेपछि खोजी कार्य सम्पन्न गरिएको हो। त्यसपछि नेपाली सेनाको टोली रसुवाको धुन्चेतर्फ फर्किएको छ।
भोटेकोशी नदीमा आएको बाढीका कारण रसुवागढी जलविद्युत् आयोजनाको क्षेत्रमा क्षति पुगेपछि सुरुङभित्र समेत कामदार फसेको हुनसक्ने आशंकामा खोजी तथा उद्धार अभियान सञ्चालन गरिएको थियो।
Discussion about this post