काठमाडौं । सर्वोच्च अदालतले नेपाल वायुसेवा निगमको कार्यकारी अध्यक्षमा महेश्वरभक्त श्रेष्ठलाई सरकारले गरेको नियुक्ति बदर गरेको छ।
न्यायाधीशद्वय सुनिलकुमार पोखरेल र बालकृष्ण ढकालको इजलासले बिहीबार उपेन्द्रबहादुर कार्कीले दायर गरेको रिटमाथि अन्तिम सुनुवाइ गर्दै श्रेष्ठको नियुक्ति कानुनसम्मत नभएको ठहर गरेको हो।
सर्वोच्चले कार्कीले आफूलाई निगमको कार्यकारी अध्यक्षमा नियुक्त गर्नुपर्ने मागसहित दायर गरेको रिटमा भने उनको दाबी नपुग्ने आदेश दिएको छ।
पर्यटन मन्त्रालयसँग सम्बन्धित ‘सार्वजनिक निकायका सदस्य तथा पदाधिकारी नियुक्ति र मनोनयनसम्बन्धी मापदण्ड, २०७३’ अनुसार सार्वजनिक निकायको कार्यकारी प्रमुखमा नियुक्त हुने व्यक्तिको उमेर ३० वर्ष पूरा भई ६५ वर्ष ननाघेको हुनुपर्ने व्यवस्था छ।
श्रेष्ठ ६५ वर्षभन्दा माथि रहेको तथा निगमबाट अवकाश पाएको करिब ३४ वर्षपछि कार्यकारी अध्यक्षमा नियुक्त गरिएको भन्दै कार्कीले सर्वोच्च अदालतमा रिट दायर गरेका थिए।
सर्वोच्चको फैसलासँगै श्रेष्ठ निगमको कार्यकारी अध्यक्ष पदबाट पदमुक्त भएका छन्
Discussion about this post